बीमा समिति अब प्राधिकरणमा रुपान्तरण, कार्तिक २२ देखि नयाँ बीमा ऐन कार्यान्वयनमा आउने

३१ असोज, काठमाडौं । नयाँ बीमा ऐन राजपत्रमा प्रकाशित भएको छ । बीमा समितिलाई प्राधिकरणमा रूपान्तरण गर्ने ऐन गत साता राष्ट्रपति बिद्यादेवी भण्डारीले प्रमाणीकरण गरेकी थिइन् । उक्त ऐन हिजो आइतबार राजपत्रमा प्रकाशित भएको छ ।

राष्ट्रपतिले प्रमाणीकरण गरेको ३१ दिन अर्थात् कात्तिक २२ गतेबाट ऐन लागु हुने प्रावधान रहेको छ । ऐन अनुसार अब बीमा समिति बीमा प्राधिकरण बन्नेछ । प्राधिकरणले आवश्यकता अनुसार नेपाल भित्र वा बाहिर जुनसुकै ठाउँमा बीमा कम्पनीले आफ्नो कार्यालय खोल्न पाउने व्यवस्था गरिएको छ । बीमाको पहुँच न्यून आय भएका वर्गका जनतासम्म पुर्‍याउनेदेखि लघुबीमा व्यवसायको प्रवर्द्धन गर्ने व्यवस्था नयाँ ऐनमा समेटिएको छ।

बीमा प्रणाली तथा बीमा व्यवासायलाई व्यवस्थित, नियमित, प्रतिस्पर्धी तथा विश्वासनीय बनाइ त्यसको विकास गर्न, गुणस्तरीय सेवा प्रदान गर्न बीमितको हक हित संरक्षण गर्न, बीमा सम्बन्धी प्रचलित कानूनलाई संशोधन र एकीकरण गरी समयानुकूल बनाउन यो ऐन बनाइएको सरकारले जनाएको छ।