प्रतिनिधिसभा सदस्यमा विजयी भएकी डा. तोसिमालाई खोकनामा भव्य स्वागत [ फोटोफिचर ]

९ मंसिर, ललितपुर । ललितपुर क्षेत्र नं ३ बाट प्रतिनिधिसभा सदस्यमा भारी मतले विजयी भएकी राष्ट्रिय स्वतन्त्र पार्टीकी उम्मेदवार डा. तोसिमा कार्कीलाई खोकनाबासीले भव्य रुपमा स्वागत गरेका छन् । ललितपुर महानगरपालिका वडा नं २१ खोकनामा कार्कीलाई विभिन्न बाजागाजाका साथ स्वागत गरिएको हो ।

उनले निकटतम प्रतिद्वन्द्वी नेकपा एमालेका अमृत खड्कालाई १८ हजार १७३ मतले पराजित गरेकी हुन् । मंसिर ४ गते भएको निर्वाचनमा कार्कीले ३१ हजार १३६ मत ल्याएका थिए भने खड्काले १२ हजार ९६३ मत प्राप्त गरेका थिए । सत्तारुढ गठबन्धनबाट उम्मेदवार नेकपा (माओवादी केन्द्र)की पम्फा भुसाल ८ हजार ७६९ मत ल्याएर तेस्रो भएकी छन् ।

कार्कीको चुनावी एजेण्डामा घरमै स्वास्थ्यमा पहुँच, महिला सशक्तीकरण, घरमै प्राविधिक शिक्षा र युवालाई रोजगारी समेटिएको छ । नेपाल मेडिकल काउन्सिलका निर्वाचित केन्द्रीय सदस्य समेत रहेका कार्की पाटन स्वास्थ्य विज्ञान प्रतिष्ठानका शल्यचिकित्सक हुन् । तस्वीरः विक्रम महर्जन