स्याङ्जा २ को मतगणनालाई लिएर निर्वाचन आयूक्तहरु नै विभाजित, मंगलबार साँझसम्म निर्णय आउने

११ मंसिर, स्याङ्जा । निर्वाचन आयोगको अर्कमण्यताका कारण स्याङ्जा क्षेत्र नम्वर २ का मतदाताहरुमा असन्तुष्टि देखिएको छ । मंसिर ४ गते सम्पन्न भएको मतदानको मतगणना प्रारम्भ वा पुनःमतदानको बिषयमा ढिलाई गरिदिदाँ मतदाताहरुमा असन्तुष्टि बढेको हो । बिशेषगरी नेपाली कांग्रेसले बुथ कब्जा गरी मतदान गरेको आरोप लगाएर नेकपा एमालेले पुनः मतदानको माग गरेपछि विवाद उल्झिएको हो । नेपाली कांग्रेसले शान्तिपुर्ण रुपमा मतदान प्रक्रिया सम्पन्न भएको र मतपेटीका निर्वाचन कार्यालयमा बुझाईसकेकाले तुरुन्त मतगणना गर्न माग गरिरहेको छ । ९ दिनदेखि दुवै दलको आन्दोलन जारी छ ।

यसै बिषयलाई लिएर स्याङ्जा निर्वाचन क्षेत्र २ को मतगणना रोकिएको बिषयमा एक निर्वाचन आयुक्तले छानविन गर्ने नगर्ने विषयमा फरक मत राखेको सार्वजनिक भएको छ । मतदान प्रक्रियामा कुनै हुलहुज्जत नभई शान्तिपुर्वक सम्पन्न भई आउँदा पनि मतगणना ढिलो हुँदा मतदातामा वितृष्णा पैदा हुने भन्दै निर्वाचन आयुक्त ईश्वरीप्रसाद पौड्यालले फरक मत राख्दै गम्भिर बिषय उठान गरेका छन् ।

मतदान अधिकृतबाट मतदान स्थलमा कुनै हुलहुज्जत लगायतका अवान्छित् गतिविधि भएको छ भनी सम्बन्धित मतदान अधिकृतले निर्वाचन अधिकृतलाई कुनै प्रतिवेदन नदिएको र मतपेटीका कानुनी प्रक्रिया पुरा गरी कातजातसहित निर्वाचन अधिकृतलाई बुझाइएको छ, आयुक्त पौडेलले फरक मत राख्दै उल्लेख गरेका छन् । प्रतिनिधिसभा निर्वाचन ऐन, २०७४ को दफा ४५ र दफा ४६ को अवस्था उपरोक्त मतदान केन्द्रहरुमा विद्यमान नरहेको भनी निर्वाचन अधिकृतको कार्यालयबाट लेखी आएकाले मतगणना रोकिनु दुखद भएको पौड्यालले जनाएका छन् ।

उपरोक्त मतदान स्थलको विभिन्न दलबाट उजुरी भएतापनि उपरोक्त ऐनको दफा ४५ र ४६ को अवस्था विद्यमान नरहेकाले निर्वाचन अधिकृतको रायसमेत अध्ययन गर्दा आयोगबाट छानविन गर्न जरुरी नदेखिएको भन्दै आयुक्त पौड्यालले आफ्नो फरक मत दर्ज गराएको रहस्य खुलेको छ । आयुक्त पौड्यालले प्रमुख निर्वाचन आयुक्त दिनेशकुमार थपलिया, निर्वाचन आयुक्तहरु रामप्रसाद भण्डारी, डा. जानकी कुमारी तुलाधर र सगुन समशेर ज.व.रा.ले गरेको फरकमतमा आयोगबाट छानविन गर्न पठाउँदा नेपाल सरकारको आर्थिक स्रोत खेर जाने र मतगणना कार्य ढिलो हुँदा निर्वाचन प्रति मतदाताको वितृष्णा पैदा हुने गम्भिर बिषय उठान गरेका छन् ।

निर्वाचन आयोग नै मतदातालाई वितृष्णा फैलाउने र आयोग प्रतिको विश्वास मतदातामा घटाउने खालको काम भइरहेको समेत आयुक्त पौड्याललले आरोप लगाएका छन् । निर्वाचन आयोगले नै खटाएको निर्वाचन अधिकृत प्रति विश्वास नभएको आशंका आयुक्त पौड्यालले राखेको फरक मतबाट प्रष्ट देखिएको छ ।

तर निर्वाचन आयोगले बहुमतको आधारमा छानविन टोली गठन गरी स्याङ्जा पठाइसकेको छ । सहसचिव फणिन्द्र गौतमको टोलीले यहाँ आएर छानविन गरी आजै काठमाडौं फर्केको छ । भोलिसम्ममा टोलीले आफ्नो रायसहितको प्रतिवेदन दिने र भोलिसाँझसम्म आयोगले निर्णय गर्ने जनाइएको छ ।

निर्वाचन अधिकृतको कार्यालय स्याङ्जा जिल्ला प्रतिनिधिसभा निर्वाचन क्षेत्र २ को कार्यालयले शान्तिपुर्ण मतदान सम्पन्न र सबै मतपेटीका सकुशल कार्यालयमा आएको प्रतिवेदन बुझाएको छ । यता सुरक्षा समितिले पनि जिल्लामा सामान्य घट्नाहरु भएपनि निर्वाचन शान्तिपुर्वक सम्पन्न भएको प्रतिवेदनमा उल्लेख गरिएको छ । देशभरीबाट मतपरिणाम सार्वजनिक गरेर सकिदा पनि यहाँको मतपरिणाम सार्वजनिक हुन ढिलाई हुँदा मतदाताहरुमा निरासा छाएको छ ।