सांघातिक हमलामा संलग्न थापालीका सुकुम्बासीविरुद्ध जाहेरी दिँदै घाइते नगर प्रहरी

१५ मंसिर, काठमाडौं । काठमाडौं महानगरपालिकाका नगर प्रहरीले थापथलीमा सुकुम्बासी बस्ती हटाउने क्रममा सांघातिक हमलामा संलग्न सुकुम्वासीका मानिसहरुविरुद्ध प्रहरीमा किटानी जाहेरी दिने तयारी गरेका छन् ।

स्रोतका अनुसार खुकुरी, भाला, लाठीसहित ढुंगामुढा प्रहारसहित आक्रमणमा उत्रिएका १९ जना विरुद्ध प्रहरीमा किटानी जाहेरी दिने भएको हो ।

महानगरीय प्रहरी काठमाडौं परिसर टेकुमा घाइते नगर प्रहरीहरुले किटानी जाहेरी दर्ता गर्न लागेका काठमाडौं महानगर प्रहरी कार्यालय स्रोतले जनायो । घाइतेहरुको तर्फबाट घरेलु हतियारसहित प्रतिकार गर्नेहरुको नाम, ठेगानासहित तयार पारिएको किटानी जोहरी दरखास्तटेकु परिसरमा दर्ता गर्ने तयारी भएको जनाइएको छ ।

यही सोमबार महानगरप्रहरी काठमाडौं-११ थापाथलीस्थित बागमती किनारमा रहेको अवैध बस्ती हटाउन जाँदा बस्तीका महिला, पुरुषसहितको टोलीले घरेलु हतियारसाथ आक्रमण गरेका थिए । आक्रमणबाट महानगर प्रहरी प्रमुख राजु पाण्डेसहित ४० भन्दा बढी घाइते भएका छन् । आक्रमणकारीहरुले केही प्रहरीलाई नियन्त्रणमा लिई लछारपछार गरी एकान्त लगेर निर्घात कुटपिट गरेका थिए । अवैध बस्ती भत्काउन लगिएको जेसीबी मेशिनमा समेत क्षति पुगेको बताइएको छ ।

आक्रमणकारीलाई कानूनबमोजिम हदैसम्मको कारबाही गर्न महानगरले यसअघि नै प्रहरीलाई पत्रारचार गरिसकेको छ ।
काठमाडौंको थापाथलीमा अवैध तरिकाले १ सय ४३ घरधुरी बनाई ‘नक्कली’ सुकुम्वासीहरुले अव्यवस्थित बसोबास गर्दै आइरहेको अधिकार सम्पन्न एकीकृत बागमती सभ्यता विकास समितिको अध्ययनले देखाएको छ ।