कतार विश्वकपको समूह चरणबाट बाहिरिएपछि घानाका मुख्य प्रशिक्षकद्वारा राजीनामा

१७ मंसिर, एजेन्सी । घानाको राष्ट्रिय फुटबल टिमका मुख्य प्रशिक्षक ओट्टो अड्डोले राजीनामा दिएका छन् । कतार विश्वकपको समूह चरणबाट बाहिरिएपछि मुख्य प्रशिक्षक ओट्टोले राजीनामा दिएका हुन् ।

विश्वकपमा घानाले ३ खेलमा मात्र १ जित निकालेको थियो । समूह ‘एच’ मा रहेको घाना पुछारमा रहदै समूह चरणबाट बाहिरिएको थियो । समूह चरणको अन्तिम खेलमा शुक्रबार घानालाई उरुग्वेले हराएको थियो ।

४७ वर्षीय प्रशिक्षक २०२२ मा मुख्य प्रशिक्षक नियुक्त भएका थिए । त्यसअघि उनले सहायक प्रशिक्षकको रुपमा घानाको टोलीमा काम गरेका थिए ।