‘हामीले गठबन्धनको विकल्पमा एमालेसँग सहकार्य गर्ने भनेका छैनौँ’: माओवादी

१८ मंसिर, काठमाडौं । नेकपा माओवादी केन्द्रले सरकार गठनका लागि सत्ता गठबन्धनलाई छाडेर नेकपा एमालेसँग सहकार्यको ढोका खुल्ला गरिएको भन्ने भनाइ गलत भएको प्रष्टीकरण दिएको छ । उसले सत्ता गठबन्धनभन्दा बाहिरबाट सरकारको विकल्प नखोजिएको स्पष्ट पारेको छ ।

पार्टी पदाधिकारी बैठकपछि सञ्चारकर्मीहरुसँग कुरागर्दै माओवादीका महासचिव देव गुरुङले अहिले माओवादीले एमालेसँग सहकार्यका लागि यो गठबन्धनको विकल्प खोज्यो भनेर आएका भनाइहरु तथ्यहीन भएको भन्दै एमालेसँग सहकार्यको कुनै तयारी नभएको बताए ।

उनले अपेक्षाकृत परिणाम नआए पनि गठबन्धन सफल भएको माओवादीको निष्कर्ष रहेको बताए । गुरुङले निर्वाचनमा थोरै यताउता भयो होला तर, अब यसलाई स्वीकार गरेर अघि बढ्नुपर्ने आफ्नै कमी कमजोरी र सीमाको पनि मुल्यांकन गरिने बताए ।

उनले भएका गल्तीलाई आगामी दिनमा सुधार गर्दै पार्टीलाई सुदृढ गर्दै अघि बढ्ने र निर्वाचनसँग सम्बन्धित विषयमा बैठकमा छलफल भएको बताए । उनले पार्टीले पहिले गठबन्धनमै छलफल गर्ने र त्यसको विकल्प खोज्ने विषयमा कुरै नगरेको बताए । उनका अनुसार सोमबार सरकार गठन लगायतका विषयमा छलफल गर्न सत्ता गठबन्धनको बैठक बोलाइएको जानकारी दिए ।

उनले अहिलेसम्म गम्भिर रुपमा सरकार गठनबारे छलफल नभएको भन्दै गठबन्धन घटकबीच अब गहन छलफल हुने बताए । भोलि गठबन्धनको बैठक बसेर निर्वाचन सीमाको बारेमा समीक्षा गर्ने तयारी भएको तर, एमालेसँग गठबन्धनको कुरा नआएको दावी गरे । उनले भने,‘हिजो कतै कतै समाचार आएको पनि देखियो तर त्यस्तो होइन । गठबन्धनको विकल्प खोजेका छैनौँ ।’