दार्चुलामा भारतीय ज्यादाति, महाकालीको सीमा पुल बन्द

१९ मंसिर, धनगढी । दार्चुलामा पर्ने नेपाल–भारत जोड्ने महाकाली नदीमाथिको अन्तर्राष्ट्रिय सीमा पुल भारतले फेरि बन्द गरेको छ । महाकाली नदीको धार नेपालतर्फ घचेट्ने भारतीय कार्यको विरोधमा आइतबार भएको दोहोरो ढुंगामुढाको विषयलाई लिएर सोमबार बिहानैदेखि भारतीय पक्षले सीमा पुल बन्द गरेको हो ।

जिल्ला प्रहरी कार्यालय दार्चुलाका प्रवक्ता प्रहरी निरीक्षक राजेश शाहीका अनुसार भारतीय व्यापारी र नागरिक मिलेर  साेमबार बिहानदेखि सीमा पुल बन्द गरिएको हो ।

सीमा नदी महाकालीमा भारतले एकतर्फी ढंगले नेपाललाई असर पुग्ने गरी तटबन्ध निर्माण गरिरहेको भन्दै नेपाली नागरिकहरुले आइतबार विरोध जनाएका थिए । पुल खुलाउनका लागि जिल्ला प्रशासन कार्यालयले आवश्यक समन्वय गरिरहेको बताइएको छ।

भारतीय पक्षकाे अतिक्रमण र हस्तक्षेपकै कारण सीमामा बसाेबास गरिरहेका नेपालीहरूले मानवीय क्षतिसमेत व्यहाेर्न विवश बन्दै आएका छन् ।