रवि लामिछानेको नागरिकता छानबिनमा अमेरिकी दूतावासलाई पत्र

१९ मंसिर, काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको नागरिकता छानबिनका क्रममा प्रहरीले नेपालस्थित अमेरिकी राजदूतावासलाई पत्र लेखेको छ ।

अख्तियार दुरुपयोग अनुसन्धान आयोगले लामिछानेको नागरिकताबारे अनुसन्धान गर्न प्रहरीलाई जिम्मा दिएसँगै प्रहरीले दूतावासलाई पत्र लेखेको हो । अमेरिकी नागरिकता त्यागेर नेपाल फिर्ता आएका भनिएका लामिछानेको नागरिकतामाथि प्रश्न उठाउँदै अभियन्ताहरुले मंसिर ९ मा गृह मन्त्रालयमा उजुरी गरेका थिए । उजुरीसँगै उनको नागरिकतामाथि छानबिन सुरु भएको हो ।

उजुरीमा लामिछानेले नेपाल नागरिकता ऐन, २०६३ को दफा १० (१) तथा नागरिकता नियमावली २०६३ विपरीत दोहोरो नागरिकता लिएको तथा निष्क्रिय भइसकेको नागरिकता प्रयोगमा ल्याएको उल्लेख गरेका थिए । अमेरिकी नागरिकता लिँदा लामिछानले नेपाली नागरिकता खारेज नगरी आफैंसँग राखेकाे व्यहाेरा उजुरीमा छ ।

लामिछाने हालै सम्पन्न प्रतिनिधिसभा सदस्यको प्रत्यक्षतर्फ चितवन २ बाट सांसद विजयी भइसकेका छन् । उनीमाथि निर्वाचनमा उम्मेदवारी दर्ताका क्रममा निष्क्रिय नागरिकता प्रयोग गरिएको आरोप छ । नेपालल छाडेर अमेरिकाबाट नागरिकता लिएका उनले नेपाली नै कायम रहन फिर्ता आएका उनले अमेरिकी नागरिकता त्याग गरे नगरेको र नेपालमा नागरिकताको प्रतिलिपि लिए नलिएको विषयमाथि अनुसन्धान सुरु गरिएको हो ।