पुष्पा न्यौपानेको मृत्यु प्रकरणः ४ जनाविरुद्ध किटानी जाहेरी

२० मंसिर, काठमाडौं । पुष्पा न्यौपानेको जलेर भएकाे मृत्यु प्रकरणमा ४ जनाविरुद्ध किटानी जाहेरी दर्ता भएको छ । विवाहका लागि ३ महिनाअघि सुधन संग्रौलासँग गरिएको इन्गेजमेन्ट टुटेपछि केटाकहाँ गएकी उनी आइतबार जलेर सख्त घाइते अवस्थामा भेटिएकी थिइन् । उनको मृत्यु हत्याबाट भएको भन्दै परिवारका सदस्यले प्रहरी वृत्त, महाराजगञ्जमा किटानी जाहेरी दिएका हुन् ।

इन्गेजमेन्ट गरेका २९ वर्षका मधु संग्रौलासहित उनको परिवारका सुधन संग्रौला, ५७ वर्षका दिनेश संग्रौला र बिन्दु संग्रौलाविरुद्ध आत्महत्या दुरुत्साहनमा जाहेरी दिएको छ ।

किटानी जाहेरीमा केटा पक्षले घरमा समेत बोलाएर मानसिक यातना दिएको र ज्यान फाल्ने अवस्थामा पुर्याएको दाबी गरिएको छ । छ । शरीरमा पेन्ट्रोल खन्याएर आगो लगाएको अवस्थामा पुष्पालाई उद्धार गरेर कीर्तिपुरस्थित बर्न सेन्टरमा पुर्‍याइएको प्रहरीको भनाइ छ ।

सोमबार बिहान साढे ९ बजे उनको उपचारका क्रममा मृत्यु भएको जिल्ला प्रहरी परिसर, काठमाडौंले जनाएको छ । सुधन र पुष्पाबीच वर्ष दिनभित्र विवाह गर्ने सहमतिमा १८ भदौमा इन्गेजमेन्ट भएको मृतकका पक्षको भनाइ छ । तर केटा पक्षले १७ कात्तिकमा इन्गेजमेन्टको दक्षिणा र गरगहना फिर्ता गरेपछि सम्बन्धमा समस्या आएको थियो ।

जोहरी परेसँगै प्रहरीसँग सुधन र पुष्पाबीच फेसबुक म्यासेन्जर, भाइबर र ह्वाटस एपसहित कल डिटेल विवरण बुझेर अनुसन्धान गर्न पनि माग गरेको छ । न्यौपाने दरबारमार्गस्थित केल्मी ब्राण्डको शोरुम सञ्चालक थिइन् ।