समयसीमाभित्रै कर बुझाउन व्यवसायीलाई आग्रह

२१ मंसिर, रसुवा । स्थायी लेखा नम्बर (प्या्न) लिएका करदातालाई निर्धारित समयसीमाभित्रै कर दाखिला गर्न आन्तरिक राजस्व कार्यालय बालाजुले आग्रह गरेको छ ।

रसुवामा प्यान लिएपछि विवरण नबुझाइ तोकिएको शुल्क समेत तिर्न छाडेपछि त्यस्ता कार्यलाई निरुत्साहित गराउन कार्यालयले आयोजना गरेको करदाता शिक्षा कार्यक्रममा बोल्ने वक्ताहरुले यस्तो आग्रह गरेका हुुन् ।

स्थानीयस्तरमै करदातालाई प्रशिक्षण दिई समयमै कर असुली गराउने योजनाअनुरुप कार्यालयल कार्यक्रम आयोजना गरेको हो ।

रसुवा उद्योग वाणिज्य संघका अध्यक्ष सुप्साङ तामाङ र चेम्बर अफ कमर्सका अध्यक्ष सञ्जीव अमात्यले राज्यलाई तिर्नुपर्ने कर दस्तुर समयमै तिर्न स्थानीय व्यापारी व्यवसायीलाई जागरुक तुल्याउन आफूहरुले सक्दो सहयोग गर्ने बताए ।
कार्यक्रममा सहभागीहरुले सामाजिक संघसंस्था एवं गैरसरकारी संस्थाले किसानलाई पशुपालन, तरकारी खेती, साना घरेलु उद्योगजस्ता कार्यलाई अनुदान दिने बहानामा प्यान लिन लगाई बेवस्ता गरेको गुनासो गरेका थिए । प्यान नम्बर प्राप्त गर्ने अधिकांश करदाताले अनुदानसमेत नपाएको र प्रयोगविहीन भइरहेको उनीहरुको भनाइ थियो ।

रसुवाको पाँचवटै गाउँपालिकामा सडक सञ्जाल जोडिएको र गाउँघरमा समेत व्यवसाय सञ्चालन भइसकेकाले सबै व्यवसायीलाई करको दायरामा आउन कार्यालयले अनुरोध गरेको छ ।

कर अधिकृत देवीप्रसाद भण्डारी र शिवहरि न्यौपानेले आयकर, ऐन, मूल्य अभिवृद्वि कर ऐन तथा अन्तःशुल्क ऐन र करसम्बन्धी नियमावलीका विषयमा करदातालाई प्रशिक्षण दिएका थिए ।