आज एकै दिन ४ जना मृत अवस्थामा फेला

२३ मंसिर, काठमाडौं । प्रहरीले विभिन्न जिल्लामा गरेर ४ जनालाई मृत अवस्थामा फेला पारेको छ । काठमाडौंकाे टोखा नगरपालिका-३ मेघासिटी हाईटस्थित सार्वजनिक खुल्ला चौरमा पालको झुपडी बनाई बसेका तारकेश्वर नगरपालिका-६ लक्ष्मीटार घर हुने ६० वर्षीय राधे अछामी सोही झुपडीमा बिहीबार मृत अवस्थामा फेला परेका छन् ।

ताप्लेजुङकाे आठराई त्रिवेणी गाउँपालिका-४ नेसुम बस्ने २३ वर्षीय वीर बहादुर कार्की ढोली सोही ठाउँस्थित चुली भिरबाट करिब १ सय ५० मिटर तल बिहीबार मृत अवस्थामा फेला परेका छन् । बुधबार घरबाट हिँडेका उनको खोजी गर्ने क्रममा उक्त स्थानमा शव फेला परेको हो ।

यस्तै कपिलवस्तुकाे मायादेवी गाउँपालिका-७ कर्महवा बस्ने ७६ वर्षीय राम शरण अहिर आफ्नै घर नजिक रहेको सार्वजनिक पोखरीमा बिहीबार मृत अवस्थामा फेला परेका छन् । गत सोमबार राति घरबाट हिँडेका उनी घर फर्कि नआएपछि खोजी गर्ने क्रममा उक्त पोखरीमा शव फेला परेको हो ।

उता रामेछापकाे मन्थली नगरपालिका-६ स्थित थापाचोकमा हाल नाम, थर, वतन नखुलेका अन्दाजी ५६ वर्षीय पुरुष बिहीबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।