शिक्षामा लगानी मात्रै बढ्यो, प्रतिफल आएन : प्रधानमन्त्री

२३ मंसिर, काठमाडौं । प्रधानमन्त्री शेरबहादुर देउवाले उच्च शिक्षामा लगानी धेरै भएपनि प्रतिफल पाउन नसकेको बताएका छन् । उनले शिक्षा समयानुकूल सुधार गर्दै जानुपर्ने समेत औल्याए ।

शुक्रबार त्रिविको दीक्षान्त समारोहलाई सम्बोधन गर्दै कुलपतिसमेत रहेका प्रम देउवाले सरकारले आधारभूत तहदेखि उच्च शिक्षासम्म उचित स्रोत र साधन उपलब्ध गराए पनि त्यसअनुसार प्रतिफल भने नदेखिएको बताए ।

‘सरकारले आधारभूत तहदेखि उच्च शिक्षासम्म उचित साधन र स्रोत उपलब्ध गराएको छ । उच्च शिक्षामा पनि समयानुकूल सुधार गर्नै जानुपर्छ’ उनले भने, तर लगानीको तुलनामा शिक्षा क्षेत्रमा प्रतिफल आउन सकेको छैन ।’ विश्वविद्यालयहरूले अब व्यवहारिक र जीवनपयोगी शिक्षामा जोड दिइनुपर्ने उनले बताए ।

शिक्षा क्षेत्रमा पटपकटक आन्दोलन चल्नु राम्रो संकेत नभएको बताउँदै समस्याको समाधान समयमै खोज्न निर्देशन दिए । त्रिवि विद्यार्थी आन्दोलनका कारण समयमै कोर्स पूरा गर्न र नतिजा दिन असफल रहँदै आएको छ ।