कक्षा १ मा प्रवेश परीक्षा लिन राेक, गर्भावस्थादेखि ८ वर्षसम्म प्रारम्भिक बालविकासको समय

२९ पुष, काठमाडौं । शिक्षा मन्त्रालयको शिक्षा तथा मानव स्रोत विकास केन्द्र सानाे ठिमीले कक्षा १ मा विद्यार्थी भर्नाका लागि प्रवेश परीक्षा नलिन विद्यालयलाई निर्देशन दिएको छ। केन्द्रको प्रारम्भिक बालविकास शाखाले पूर्वप्राथमिक तह र कक्षा १ मा प्रवेश परीक्षा सञ्चालन नगर्न निर्देशन दिएको हो ।

केन्द्रले प्रवेश परीक्षा लिने र सोसँग सम्बन्धित तयारी कक्षा सञ्चालन गर्ने जस्ता कार्य भएमा रोक्न र भर्नाका लागि अन्य उपयुक्त विधि अवलम्वन गर्न सम्पूर्ण स्थानीय तह र शिक्षा विकास तथा समन्वय इकाइलाई निर्देशन दिएको छ ।

गर्भावस्थादेखि ८ वर्षसम्मको उमेर प्रारम्भिक बालविकासको समय भएको र यो उमेर समूहका बालबालिकालाई सर्वांगीण विकास हुने खालका क्रियाकलापहरूमा बढी संलग्न गराउनु पर्ने केन्द्रले भन्दै यस्तो निर्देशन दिएको हो ।

केन्द्रले जारी गरेको विज्ञप्तिमा मण्टेसरी र संस्थागत विद्यालयका पूर्वप्राथमिक कक्षामा बालबालिकाको सर्वांगीण विकास हुने क्रियाकलाप नगरी पढाउने, घोकाउने तथा कण्ठ गराउने र कतिपय विद्यालयहरूले कक्षा १ मा भर्नाको लागि प्रवेश परीक्षा लिने गरेको पाइएपछि रोक्न निर्देशन जारी गरेको जनाइएकोे छ ।

राष्ट्रिय शिक्षा नीति, २०७६, अनिवार्य तथा निःशुल्क शिक्षासम्बन्धी ऐन, २०७५ र सोको नियमावली २०७७, शिक्षा ऐन २०२८ र नियमावली, २०५९ विद्यालय शिक्षाका लागि राष्ट्रिय पाठ्यक्रम प्रारुप २०७६, प्रारम्भिक बालविकास तथा शिक्षाको पाठ्यक्रम २०७७ र आधारभूत तह (कक्षा १-३) को पाठ्यक्रम २०७६ ले शिशु विकास केन्द्र, प्रारम्भिक बालविकास पूर्वप्राथमिक शिक्षा र आधारभूत तह (कक्षा १–३) मा बालबालिकाको भर्ना, विकास तथा सिकाइ क्रियाकलाप सञ्चालन, विकास तथा सिकाइको मूल्यांकन एवं स्तरीकरण सम्वन्धमा स्पष्ट व्यवस्था छ।