गृहमन्त्री लामिछानेकाे मुद्दामा फैसला सुनाउने तयारी, सर्वोच्च परिसरमा बाक्लाे संख्यामा सुरक्षाकर्मी परिचालन

१३ माघ, काठमाडौं । सर्वोच्च अदालत परिसरमा बाक्लो संख्यामा सुरक्षाकर्मी परिचालन गरिएको छ । शुक्रबार सर्वोच्चमा उपप्रधान एवम् गृहमन्त्री रवि लामिछानेको नागरिकतासम्बन्धी मुद्दाको सुनुवाइ सकिएर फैसला सुनाउने तयारी भइरहेको छ ।

संवैधानिक इजलासमा मुद्दाको सुनुवाइ सकिएसँगै जिल्ला प्रहरी परिसर काठमाडौँबाट डीएसपी पवत भट्टराईको नेतृत्वमा थप टोली सर्वोच्चमा पठाइएको छ ।

राष्ट्रिय स्वतन्त्र पार्टीका सभापति समेत रहेका लामिछानेको नागरिकतासम्बन्धी मुद्दामा पक्ष र विपक्षमा बहस सकिएसँगै फैसलाका लागि न्यायाधीशहरु आन्तरिक छलफलमा जुटेका छन् । फैसला आजै आउने वा मिति तोक्ने भन्नेबारे अहिलेसम्म कुनै जानकारी उपलब्ध गराइएको छैन । तर संक्षिप्त फैसला आजै आउने संभावना बढेको सर्वोच्च प्रशासनले जनाएको छ ।

संवैधानिक इजलासमा आज रविको पक्षबाट वरिष्ठ अधिवक्ता नरेन्द्र केसीसहित अधिवक्ताहरु आशिष अधिकारी, सुदिग्य पन्द, यज्ञमणि न्यौपाने र शशिकुमार पोखरेलले बहस गरेका थिए ।

यस्तै निवेदकको पक्षबाट सुरेन्द्र भण्डारी, रमन कर्ण, अनिता श्रेष्ठ, सन्तोष भण्डारी र कीर्तिनाथ शर्मा पौडेलले जवाफी बहस गरेका थिए ।

कामु प्रधानन्यायाधीश हरिकृष्ण कार्की, न्यायाधीश विश्वभरप्रसाद श्रेष्ठ, ईश्वरप्रसाद खतिवडा, डा. आनन्दमोहन भट्टराई र अनिलकुमार सिन्हाको संवैधानिक इजलासमा बुधबारदेखि मुद्दाको सुनुवाइ भएको थियो ।

लामिछानेविरुद्ध अमेरिकी नागरिकता त्याग गरेको घोषणा गरेपनि नेपाली नागरिकता नलिई पुरानै नागरिकताको प्रतिलिपि राखेर निर्वाचन आयोगमा दल दर्ता गराएको, प्रतिनिधिसभा निर्वाचनमा उम्मेदवार बनेर चुनावमा विजयी बनेको तथा सरकारमा मन्त्री पदमा बसेको जस्ता आरोप लगाइएको छ ।

नेपाली नागरिकता नभएका व्यक्ति सरकारका उच्च जिम्मेवारीमा पुगेको भन्दै खारेजीको माग रिटमा गरिएको छ । संभावित आदेशलाई लिएर राजनीतिक क्षेत्र र सामाजिक संजालमा अनेक किसिमबाट टिकाटिप्पणी भइरहेका छन् ।

रिट जारी भएकाे खण्डमा लामिछानेकाे पद स्वतः जानेछ ।