पत्रकार सम्मेलन गरेरै मागे क्यानका अध्यक्ष चन्द र पदाधिकारी राजिनामा

१५ माघ, काठमाडौं । नेपाल क्रिकेट संघ (क्यान)का अध्यक्षसहित कार्य सम्पादन समितिका पदाधिकारीहरुको राजीनामा माग गरेका छन् । क्यान ७ जना केन्द्रीय सदस्यले अध्यक्ष चतुरबहादुर चन्दसहित कार्य सम्पादन समितिमा रहेका ५ जना पदाधिकारीको राजिनामा माग गरेका हुन् ।

उनीहरुले कार्यसम्पादन समितिका अध्यक्ष समेत रहेका अध्यक्ष चन्द, सचिव प्रशान्त विक्रम मल्ल, कोषाध्यक्ष रोसन सिंह, सदस्यहरु दुर्गाराज पाठक र पदम खड्काले तत्काल राजीनामा दिनुपर्ने माग गरेका छन् ।

केन्द्रिय सदस्यहरुमा ऋषिराज गौतम, दाउद अन्सारी, सञ्जयराज सिंह, करण महतरा क्षेत्री, अमितवीर पाण्डे, छुम्बी लामा र धर्मराज गिरीले आज काठमाडौंमा पत्रकार सम्मेलन गरेर राजीनामा माग गरे हुन् ।

उनीहरुले नेपाल टी–२० लिग आयोजनाको जिम्मेवारी भारतीय कम्पनी सेभेन थ्री स्पोर्टसलाई दिएर गल्ती गरेको र सोही कारण लिगमा ‘स्पट फिक्सिङ’ जस्तो गम्भीर आरोप लागेको बताए ।

उनीहरुले सेभेन थ्री स्पोर्टस नै फिक्सिङमा संलग्न भएको पाइएको र यसो मुख्य जिम्मेवार क्यान नेतृत्व भएको उनीहरुले आरोप लगाए ।

स्पट फिक्सिङ’मा संलग्नताको आरोपमा क्रिकेट राष्ट्रिय टिमका खेलाडी मेहबु आलम र मोहम्मद आदिल आन्सरी पक्राउ परेका छन् । उनीहरुमाथि सीआईबीले अनुसन्धान गरिरहेको छ ।

लिग गएकाे पुस अन्तिम हप्तामा नेपालमा सम्पन्न भएकाेा थियाे ।