प्रहरी हवल्दारलाई ठक्कर दिने गाडी चालकविरूद्ध ‘अभद्र व्यवहार’ मुद्दा चलाउने तयारी

१६ माघ, पोखरा । मादक पदार्थ सेवन (मापसे) जाँच गर्न बसेका प्रहरीको टोलीलाई ठक्कर दिएका गाडी चालक सौरभ थापालाई हिरासतमा राखेर अनुसन्धान गर्न जिल्ला अदालतले ५ दिनको म्याद दिएको छ ।

रामबजारस्थित भारतीय पेन्सन क्याम्प अगाडि गत बिहीबार बिहान ३ बजे प्रहरी हवल्दार चित्रबहादुर वली सहित टोली चेकिङमा बसेको समयमा मापसे गरेर गाडी चलाएका चालक थापालाई रोक्न खोज्दा भागेका थिए । राेक्ने क्रममा गाडी हुइँक्याएर भाग्दा झ्यालले लागेर हवल्दार वलीको हात भाँचिएको थियो ।

थापालाई शुक्रबार नै प्रहरीले पक्राउ गरेर अदालतबाट ५ दिन म्याद लिई अनुसन्धान जारी राखेको छ । आरोपित अटो मोबाइल्स एसोसिएसन अफ नेपाल (नाडा)का अध्यक्ष ध्रुव थापाका छोरा रहेको खुलेको छ ।

थापालाई कास्की प्रहरीले भने अभद्र व्यवहारको मुद्दा चलाउने तयारी गरेको छ । थापाविरुद्ध ज्यान मार्ने उद्योग कसुरमा मुद्दा चलाउनुपर्ने माग गरिएको छ ।