गृह मन्त्रालयबारे निर्णय गर्न पेरिसडाँडामा माओवादी केन्द्रको पदाधिकारी बैठक

१७ माघ, काठमाडौं । सरकारको नेतृत्व गरिरहेको नेकपा (माओवादी केन्द्र)को दोस्रो दिनको पदाधिकारी बैठक पार्टी केन्द्रीय कार्यालय पेरिसडाँडामा सुरु भएको छ ।

संगठन विस्तार, पार्टी एकता र नेताहरुको कार्यविभाजन लगातका विषयमा छलफल गर्नका लागि बैठक बसेको हो । यसअघि सोमबार दिउँसो बसेको बैठक केहीबेर बसेर स्थगित भएको थियो ।

सोमबारको बैठकमा गृह मन्त्रालयको बारेमा प्रारम्भिक छलफल भएको थियो । आजको बैठकमा गृहमन्त्रालय रास्वपालाई दिने कि नदिने भन्नेबारे छलफल गरेर टुंगाेमा पुग्ने जनाइएको छ। सोमबारको बैठकमा धारणा राख्ने अधिकांशले गृह मन्त्रालयले पार्टीले नै राख्नुपर्ने मत राखेका थिए ।