अर्थतन्त्र गम्भिर अवास्थामा छ, सुधारको प्रयासमा छौँः प्रधानमन्त्री

२० माघ, सिन्धुपाल्चोक । प्रधानमन्त्री पुष्पकमल दाहाल प्रचण्डले देशको अर्थतन्त्र गम्भीर मोडमा रहेको भन्दै त्यसलाई सुधारका लागि सरकारले प्रयत्न गरिहेको बताएका छन् । उनले अहिले सरकारका अगाडी आर्थिक क्षेत्र चुनौतीका रुपमा रहेपनि त्यसलाई सुधारेर ठिक ठाउँमा ल्याउन सरकारले कोसिस गरिहेको बताएका छन् । अर्थतन्त्र सुधारका लागि सबै क्षेत्रसँग छलफल भइरहेको उनको भनाइ छ ।

शुक्रबार दिउँसो सिन्धुपाल्चोकको जुगल गाउँपालिका–५, चनौटेस्थित चीनको सहयोगमा रत्नराज्य माध्यमिक विद्यालयको नवनिर्मित भवनको उद्घाटन समारोहलाई सम्बोधन गदै प्रधानमन्त्री प्रचण्डले गम्भीर अवस्थामा रहेको देशको अर्थतन्त्र सुधार्ने अठोट पनि लिएका छन् । उनले भने, ‘देशको सिंगो अर्थतन्त्रमा गम्भीर समस्या आएको छ । तपाइँहरूले केही कुरा सुन्नु भएकै होला, मैले प्रधानमन्त्री बनेसँगै यी समस्या हल गर्ने अठोट लिएको छु । केही सकरात्मक संकेत पनि देखिएको पनि छ ।’

प्रचण्डले आफूले तेश्रो पटक सरकारको जिम्मेवारी सम्हालेपछि मन्त्रिपरिषद्को पहिलो बैठकबाटै अर्थतन्त्रमा सुधार गर्ने निश्चय लिएको बताए । यसका लागि निजी क्षेत्र र सरकारको सहकार्यमा अर्थतन्त्र उकास्ने लक्ष्य राखिएको उनको भनाइ थियो । बैंक र व्यवसायीबीच सहज सहकार्यको स्थिति सिर्जना भएकाले अर्थतन्त्रले क्रमशः विकासको गति लिनेमा आफु ढुक्क रहेको प्रधानमन्त्रीले बताए ।

यस क्रममा उनले नेपालका लागि चिनियाँ सहयोगको खुलेर प्रसंसा गरेका थिए । साथै सिन्धुपाल्चोकमा भूकम्प र बाढीबाट पीडित बस्तीलाई पुनर्वास गराउन आफू तयार रहेको उनले बताएका थिए । चनौटेमा चीनको एक अर्बभन्दा बढी लागतमा र्निर्मित विद्यालयका अत्याधुनिक सुविधायुक्त ६ वटा भवन चिनियाँ मोडेल अनुसार निर्मित छन् । भवन निर्माणमा बालुवा, गिटी र ढुंगा मात्रै नेपालको प्रयोग भएको छ । अन्य सबै सामग्री चीनबाटै ल्याएर चिनियाँ मजदुरबाट बनाइएको हो ।