मधेश सरकारमा माओवादी केन्द्रबाट शहीद रामवृक्षकी छाेरीलाई मन्त्री बनाइँदै

२३ माघ, जनकपुरधाम । मन्त्री संख्यामा सहमति हुन नसक्दा सरकारबाहिर बसेको नेकपा (माओवादी केन्द्र) मधेश प्रदेश सरकारमा सहभागी हुने भएको छ ।

उसले सरकारमा सहभागी हुने निर्णय लिएसँगै पार्टीको तर्फबाट उद्योग, वन तथा पर्यटन मन्त्रीमा शहीद पुत्री सुनिता यादवलाई पठाउने भएको छ । उनी जनयुद्धका शहीद रामवृक्ष यादवकी छोरी हुन् । जसपा नेतृत्वको सरकारमा दुई मन्त्रालय माग गदै आएको माओवादीले एक मन्त्री र एक राज्यमन्त्री पाउने भएको छ ।

राज्यमन्त्रीमा रहबर अंशारीलाई पठाउने भएको छ । यसअघिका सरकारमा गृह तथा संचारमन्त्री भइसकेका भरत साहका लागि पनि मन्त्रालयको माग गरिरहेको माओवादी केन्द्र अन्ततः एक मन्त्री र एक राज्यमन्त्रीमै खुम्चिन विवश भएको हो ।

प्रदेशमा रहेका १० मध्ये ९ मन्त्रालय जसपा, एमाले र जनमतले भागबण्डा गरिसकेका छन् ।