बेल्जियमका जान नेपाली भलिबल टिमको मुख्य प्रशिक्षकमा नियुक्त, मार्च पहिलो हप्ता नेपाल आईपुग्ने

१ फागुन, काठमाडौं । बेल्जियमका जान जोसे डी ब्रान्ट नेपाली राष्ट्रिय भलिबल टिमका मुख्य प्रशिक्षक नियुक्त भएका छन् । नेपाल भलिबल संघका अनुसार बेल्जियम प्रशिक्षक जान डीलाई ६ महिनाको लागि राष्ट्रिय टिमको मुख्य प्रशिक्षक नियुक्त गरिएको हो ।

उनले नेपालको महिला र पुरुष दुबै टोली हेर्ने छन् । जान डी आगामी मार्च पहिलो हप्ता नेपाल आईपुग्ने छन् । उनी अगस्टसम्म नेपालमा रहने छन् । अन्तराष्ट्रिय भलिबल महासंघ ‘एफआईभीभी’ को सहयोगमा जान डी नेपाल आउन लागेका हुन् ।

तर एसियन गेम्सको बेला भने जान फर्कनेछन् र नयाँ प्रशिक्षक आउने छन् । यसअघि पनि एआईभीबीको सहयोगमा नेदरल्याण्ड्सका प्रशिक्षकहरु म्याट भान विजल, लेस्ली जे जोङ र हान अविङले नेपालमा आएर प्रशिक्षक दिइसकेका छन् । नेपाली भलिबलको विकासका लागि एआईभीबीले विदेशी प्रशिक्षक पठाएर सहयोग गर्दै आइरहेको छ ।

६४ वर्षीय प्रशिक्षक जान डी निकै अनुभवी प्रशिक्षक हुन् । बेल्जियमका पूर्व राष्ट्रिय खेलाडी समेत रहेका जान डीले बेल्जियम र हंगेरीको राष्ट्रिय महिला टिम हेरिसकेका छन् । चीनमा आयोजना हुने एसियन गेम्समा नेपालको महिला र पुरुष भलिबल टोलीले सहभागिता जनाउदैछ ।