शैलुङ पर्यटन प्रवर्द्धनका लागि हिलेदेवीदेखि शैलुङसम्म ‘म्याराथन’ हुँदै

२४ फागुन, मन्थली । रामेछापकै उत्कृष्ट पर्यटकीय गन्तव्यस्थल शैलुङमा म्याराथन हुने भएको छ । पर्यटक प्रवर्द्धन गर्ने उद्देश्यले आउँदो चैत ४ गते सुनापति गाउँपालिको मुकाम हिलेदवीबाट शैलुङ डाँडासम्म ५५ किमि ‘शैलुङ म्याराथन’ प्रतियोगिता संचालन हुने भएको हो ।

शैलुङ ऐतिहासिक, धार्मिक, सांस्कृतिक र प्राकृतिक गन्तव्यको रुपमा परिचित छ । नयाँ वर्ष वैशाख १ मा यहाँ आन्तरिक र विदेशी पर्यटकको घुइँचो लाग्ने गर्दछ । यस याममा शेलुङ क्षेत्रमा थरिथरि रंगका गुराँस फूलको अवलोकन गर्न पाइन्छ ।

खेल पर्यटन मार्फत पर्यटकीय क्षेत्रको विकासका लागि म्याराथनको आयोजना गर्न लागिएको राष्ट्रिय खेलकुद परिषद्का सदस्य सचिव टंकलाल घिसिङकाे भनाइ छ ।

प्रतियोगितामा सय जनाभन्दा बढी संख्यामा युवक युवती र विदेशी पर्यटकले भाग लिने समितिले जनाएको छ । खेल ५५ किलोमिटर, २५ किलोमिटर र ५ किलोमिटर दूरीका दौड हुनेछन् ।

दौड हिलेदेवीको सादीडाँडाबाट सुरु भई खाँडादेवी मन्दिर–गाल्बा बजार–अग्लेश्वर दोरम्बा हुँदै शैलुङ डाँडासम्म पुग्नु पर्नेछ । २५ किलो मिटर दौडमा सहभागी हुने खेलाडीहरूले सुनापतिको हिलेदेवी–गाल्बा–अग्लेश्वरी–दोरम्वा हुँदै शैलुङडाँडा पुग्नु पर्नेछ भने ५ किलो मिटर दौड प्रतियोगितामा सहभागी हुने खेलाडीले दोरम्बाको शैलुङ क्षेत्रमा मात्रै दौडने भएका छन् ।

म्याराथनमा ५५ किलोमिटरमा प्रथम हुने खेलाडीले नगद ७५ हजार, द्वितीय हुने खेलाडीले ३५ हजार र तृतीय हुनेले नगद २० हजार रुपैयाँ र प्रमाणपत्र पाउने छन् ।

यस्तै, २५ किलोमिटर म्याराथनमा प्रथम हुने खेलाडीले प्रथमलाई ४० हजार, द्वितीयलाई २० र तृतीय हुनेलाई १० हजार नगद र प्रमाणपत्र प्रदान गरिनेछ । ५ किलोमिटर म्याराथनतर्फ प्रथम हुनेले १५ हजार, द्वितीयले १० तृतीय हुनेले ५ हजार रुपैयाँ र प्रमाणपत्र दिइनेछ ।

म्याराथनको व्यवस्थापन राष्ट्रिय खेलकुद परिषद्को आर्थिक सहयोग, जिल्ला खेलकुद विकास समितिको रहनेछ भने सुनापती, खाँडादेवी र दोरम्बा शैलुङ गाउँपालिकाको सहकार्य र हिमालयन ट्रेल रनिङको प्रायोजन रहनेछ ।

परिषद्का सदस्य सचिव घिसिङ रामेछापको सुनापतिस्थित दिमीपोखरीका बासिन्दा हुन् । उनी द्वन्द्वकालमा समर्थक रहेका थिए । पछि उनी  नयाँबानेश्वरस्थित शैक्षिक परामर्श केन्द्र खाेलेर नेपाली विद्यार्थीलाई विदेशी कलेजहरुमा पठाउने काम गर्दै आइरहेका बेला उनलाई सदस्य सचिवमा राजनीतिक नियुक्ति दिइएकाे हाे ।