‘धोकेबाज हौ तिमी’ गीतको विवाद गर्नुपर्ने कुनै आवश्यकता नभएको गायक शिव परियारको स्पष्टीकरण

७ चैत, काठमाडौं । ‘धोकेबाज हौ तिमी’ नामक गीतका गायक शिव परियारले गीतबारे सामाजिक सञ्जाल मार्फत आफ्नो स्पष्टीकरण दिएका छन्। गायक परियारले सो गीतबारे आधिकारीक कुरा नबुझी बनिबनाउँ कन्ट्रोभर्सि निकालेको भन्दै सामाजिक सञ्जाल फेसबुक मार्फत बिज्ञप्ति जारी गर्दै स्पष्टीकरण दिएका हुन्।

गायक परियारले सामाजिक सञ्जालबाट मंगलबार विज्ञप्ति जारी गर्दै ‘धोकेबाज हौ तिमी’ गीतको विवाद गर्नुपर्ने कुनै आधार वा आवश्यकता नभएको बताएका छन्। उनले गीतका मेल, फिमेल र चाइल्ड भर्सनका तीनै गायक गायिका आधिकारिक र ओरिजिनल गायक गायिका भएको बताएका हुन्।

उक्त गीतका आधिकारिक स्रष्टा र संगीतकार सुवास कार्की रहेको समेत उनले उल्लेख गरेका छन्। उनले गीतका निर्माता कार्कीले महिला, पुरुष र बालबालिका गरी ३ ओटाको स्वरमा गीत निकालेको र यो गीतमा स्वर दिने कुनै एक गायक गायिकाले यो गीत मेरो मात्रै हो भन्न नहुने लेखेका छन्।

पछिल्लो समय एलिना चौहानले गाएको उक्त गीतको फिमेल भर्सन व्यापक हिट भएपछि शिवले आफ्नो स्वरमा रहेको मेल भर्सन आफ्नै भएको भन्दै एक टीभीमा अन्तर्वार्तामा बताएका थिए। त्यसपछि उनी विवादमा तानिएका थिए।