बालुवाटारमा मन्त्रालय बाँडफाँड र साझा कार्यक्रमबारे संयुक्त छलफल

१४ चैत, काठमाडौं । मन्त्रिपरिषद विस्तार र सरकारका न्यातनम कार्यक्रमबारे दशदलीय गठबन्धनका शीर्ष नेताबीच प्रधानमन्त्री निवास बालुवाटारमा छलफल चलिरहेको छ ।

सरकारको न्युनतम साझा र मन्त्रालयको भागबण्डा मिलाउन आजको छलफल निर्णयक हुने बताइएको छ । १० पुसमा बनेको सत्ता समीकरण राष्ट्रपति निर्वाचनअघि टुटेपछि नयाँ गठबन्धनले मन्त्रिपरिषद विस्तार र आफ्नो न्युनतम साझा कार्यक्रम बनाउने तयारी गरेको थियो । न्युनतम साझा कार्यक्रममा सहमति जुटेपछि मन्त्रिपरिषद विस्तार गने नेताहरुले बताएका थिए ।

बालुवाटारमा प्रधानमन्त्री पुषपकमल दाहाल प्रचण्ड, नेपाली कांग्रेस, नेकपा माओवादी केन्द्र, जनता समाजवादी पार्टी, नेकपा एकीकृत समाजवादी, जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी, राष्ट्रिय जनमोर्चा, नेपाल समाजवादी पार्टी र आम जनता पार्टीका नेताहरु सहभागी छन् । सरकार सञ्चालन र मन्त्रालय बाँडफाँडका विषयमा छलफल गर्न बैठक बसेको हो ।

प्रधानमन्त्री प्रचण्डले ६ चैतमै विश्वासको मत लिए पनि एक साता बित्दा समेत मन्त्रिपरिषद्लाई पूर्णता दिन सकेका छैनन् । प्रचण्डले राष्ट्रपति र उपराष्ट्रपति निर्वाचनमा बनेको गठबन्धनलाई समेटेर मन्त्रिपरिषद् विस्तार गर्न चाहे पनि गठबन्धन दलहरूबीच मन्त्रालय बाँडफाँडका विषयमा सहमति जुट्न नसक्दा मन्त्रिपरिषद् विस्तारमा ढिलाइ भइरहेको छ । प्रधानमन्त्री प्रचण्डले एक्लैले १६ मन्त्रालयको कार्यभार सम्हालिरहेका छन् ।