इँटा व्यवसायीद्धारा काचो इँटाको बीमा हुनुपर्ने माग


Share This

नेपालबहस संवाददाता    

विराटनगर । इँटा व्यवसायीले वातावरण संरक्षण र काचो इँटाको बीमा हुनुपर्ने माग अगाडि सारेको छ । नेपाल इँटा व्यवसायी महासङ्घद्वारा मंगलबार आयोजित पत्रकार भेटघाट कार्यक्रममा उनीहरुले इँटा उद्योगमा काम गर्ने मजदूरका छोरा र छोरीलाई शिक्षा दिने, बाल मजदूर नराख्ने र चिम्नीबाट फैलिने प्रदूषणलाई अत्याधुनिक प्रविधि प्रयोग गरी प्रदूषण हुन नदिनेतर्फ सचेत हुनुपर्नेमा जोड दिए ।

मुलुकभर एक हजारभन्दा बढी इँटा उद्योगी रहेका छन् । तीमध्ये नेपाल इँटा व्यवसायी महासङ्घमा ६८० उद्योगी आबद्ध छन् । झन्डै दुई लाख ४० हजारलाई रोजगारी दिएको नेपालका इँटा उद्योगले बर्षेनी रु ७० करोडभन्दा बढी राजश्व बुझाउने गरेको सो अवसरमा जानकारी गराइयो ।

गत वर्ष प्रतिटन रु १८ हजार मूल्य पर्ने कोइला अहिले रु २९ हजार पर्ने गरेकाले इँटाको मूल्य केही वृद्धि भएको हुँदा सरकारले कोइला खरीदमा सहजीकरण गरी दिनुपर्ने माग महासङ्घको छ ।

कार्यक्रममा महासङ्घको चौथो महाधिवेशन भदौ १४ गते विराटनगरमा सम्पन्न हुने र यसका लागि ३०० प्रतिनिधि सहभागी हुने कोशी इँटा व्यवसायी सङ्घका अध्यक्ष महेन्द्र साहले जानकारी दिए ।

तपाईको प्रतिक्रिया