सिंगाका किसानले दूध बिक्री गरेर ५० लाखभन्दा बढी रकम गाउँ भित्र्याए



नेपालबहस संवाददाता
 




म्याग्दी । बेनी नगरपालिका–४ सिंगाका किसानले दूध बिक्री गरी मनग्य आम्दानी गरेका छन् । दूध बिक्री गरेर यहाँका किसानले रु ५० लाखभन्दा बढी रकम गाउँ भित्र्याएका छन् ।

आव २०७४/७५ मा यहाँका किसानले सिंगास्थित जनभावना दुग्ध सहकारी संस्थामार्फत ७७ हजार ९५५ लिटर दूध बिक्री गरेको सो सहकारीका व्यवस्थापक कोपीलाल पौडेलले जानकारी दिए ।

यहाँको दूध सहकारीले सदरमुकाम बेनी र तातोपानी बजारमा बिक्री गर्ने गरेको छ । सहकारीले किसानबाट प्रतिलिटर दूध रु ५७ देखि रु ५८ सम्ममा खरीद गर्ने गरेको छ ।

सहकारीले सो दूध डेरी उद्योगलाई प्रतिलिटर रु ६७ देखि रु ७५ सम्ममा बिक्री गर्छ । सहकारीले सिंगा, सुर्केमेला र ठूलोखोलाका किसानबाट दूध संकलन गर्दैआएको छ ।

सहकारीमा ५५ किसान आवद्ध छन् । “एक जनाले दैनिक ४५ लिटरसम्म दूध बिक्री गर्ने गर्छ,” व्यवस्थापक पौडेलले भने । सहकारीले दूध सङ्कलन गर्न थालेपछि बजारको समस्या टरेको स्थानीयवासी मीना खत्रीले बताए । दूध बेचेको पैसाले बालबच्चा पढाउन तथा घरखर्च चलाउन सहज भएको उनको भनाइ छ ।

बेनीमा वधशाला

सदरमुकाम बेनीमा व्यवस्थित वधशाला सञ्चालनमा आएको छ । बेनी नगरपालिकाले हाडेभिरमा यसै हप्तादेखि उक्त वधशाला सञ्चालनमा ल्याएको हो ।

उपभोक्ताको १५ प्रतिशतसहित रु १२ लाखमा वधशाला निर्माण गरिएको उपभोक्ता समितिका अध्यक्ष विक्रम श्रेष्ठले जानकारी दिए । यहाँ दुई वधस्थल निर्माण गरिएको छ । वधशालाबाट निस्कने फोहर व्यवस्थित गर्न खाडल बनाइएको छ । खाडलमा जम्मा हुने फोहरलाई मल बनाइ बिक्री गरिनेछ ।

राँगा र भैँसी बाँध्न टहरा बनाइएको छ । यसअघि बेनीको खुल्ला मञ्च नजिकै तथा डल्लेपीपलमा अव्यस्थितरुपमा राँगा भैँसी वध गरिँदै आएको थियो ।

दुर्गन्धबाट वरपरका बस्तीका बासिन्दा प्रभावित भएका थिए । वधशाला निर्माणपछि मासु बिक्री गर्न सहज भएको व्यवसायीले बताएका छन् ।