प्रधानमन्त्रीले अनुगमन गरेर फर्किएको केही घण्टा पछि नै नारायणगढ मुग्लिन सडक अबरुद्ध


Share This

नेपालबहस संवाददाता    

१९ साउन, काठमाडौं । नारायणगढ मुग्लिन सडकखण्डको कालीखोला नजिकै बुधबार साँझ अबेर खसेको पहिरोले बगाएर एक यात्रुबाहक बस बेपत्ता भएको छ भने एटा जिप पुरिएको छ ।

मानवीय क्षति भने हुन पाएको छैन । जिल्ला प्रहरी कार्यालय चितवनका प्रमुख प्रहरी उपरीक्षक दीपक थापाका अनुसार काठमाडौँबाट इलाम जान आउँदै गरेको ना ६ ख ७१२१ नम्बरको बस त्रिशूली नदीमा खसेर बेपत्ता भएको हो भने बा १५ च ९३८१ नम्बरको स्करपियो जिपको अघिल्लो भाग पहिरोले पुरेको हो ।

माथिबाट ढुंगा खस्न थालेपछि चालकले बस रोकेर सबै यात्रु झारेलगत्तै ठूलो पहिरोले बसलाई त्रिशूलीमा झारेको हो । बसको पछिपछि रहेको स्करपियो रोकेर चालक भागेर बचेको प्रहरी उपरीक्षक थापाले बताए । मुग्लिनबाट तीन किलोमिटर नारायणगढतर्फ इच्छाकामना गाउँपालिका–६ कालीखोला नजिकै साँझ ७ः३५ बजे पहिरो खसेको हो ।

पहिरो पन्छाउन साँझ मुग्लिनबाट नेपाल प्रहरी र सशस्त्र प्रहरी जाने क्रममा दुई किलोमिटरमा पुनः पहिरो खसेपछि रातमा पहिरो पन्छाउन नसकिएको थापाले बताए ।

दुवै ठाउँको पहिरो पन्छाउने काम र बेपत्ता बसको खोजीकार्य आज बिहानै देखि शुरु भएको उनले बताए । पहिरो खसेका दुवै ठाउँमा लेदो बगिरहेकाले काममा कठिन भएको छ । स्तरोन्नति भइरहेको सो सडकको हिजो मात्र प्रधानमन्त्री शेरबहादुर देउवाले निरीक्षण गरी छिटो काम सम्पन्न गर्न निर्देशन दिएका थिए ।

यसैबीच, मुग्लिन सडकमा जनताले पाएको सास्तीप्रति प्रधानमन्त्री देउवाले चिन्ता व्यक्त गरेका छन् ।

उक्त सडकखण्डको स्थलगत निरीक्षण गर्दै उनले पहिरोले जनतालाई सधैँ पीडित बनाइ रहेको हुँदा यसलाई सदाका लागि अन्त्य हुनेगरी काम गर्नुपर्ने बताए ।

प्रधानमन्त्री देउवाले कुनै पनिबेला पहिरो खस्ला भन्ने डरलाग्दो अवस्था आएको उल्लेख गर्दै ‘बाटोमा कुनै बेला पनि पहिरो आइदेला भन्ने जस्तो डरलाग्दो स्थिति छ, सालसालै पहिरो आउला भन्ने खतरा भयो, अब यो बाटोमा पूरा अध्ययन गरेर पहिरो आउने खतरा सदाका लागि बन्द गर्नुपर्छ, कसरी हुन्छ, यो चौबिसै घण्टा खुला हुने बनाउनुप¥यो,” ।

चितवनको आँपटारीदेखि करिब २० किलोमिटर क्षेत्र सेती दोभानसम्म स्थलमार्गबाट अनुगमन गरेका प्रधानमन्त्री देउवा सेती दोभान पुग्दा केही समय अघि मात्रै पहिरो खसेको थियो । त्यसको केही परसमेत पहिरो खसेको जानकारी आएपछि प्रधानमन्त्री देउवालाई सेती दोभानबाट अघि जान सुरक्षा निकायले दिएन ।

सुरक्षा निकायले रोक्दारोक्दै पनि प्रधानमन्त्री देउवाले खै–खै पहिरोसम्म जाउ भन्दै अघि बढेका थिए । त्यसपछि उनले अध्ययन गरेरै पहिरो सदाकालागि अन्त्य गर्न सम्बन्धीत निकायलाई निर्देशन दिए ।

अनुगमनमा प्रधानमन्त्री देउवासँगै भौतिक योजना तथा पूर्वाधारमन्त्री वीरबहादुर बलायर तथा मन्त्रायलका सचिव देवेन्द्र कार्की, प्रधानमन्त्री कार्यालयका सचिव चन्द्र घिमिरे, सडक डिभिजन कार्यालय तथा नारायणगढ मुग्लिन सडक आयोजनाका प्रमुखसहित अधिकारीहरुको सहभागिता थियो ।

सो अवसरमा मन्त्री बलायरले सडक निर्माण समयमै सक्न कडा निर्देशन दिएको बताउँदै सडकको समस्या सदाका लागि अन्त्य गर्नुपर्नेमा जोड दिए ।

‘जहिले पनि यो बाटो अवरुद्ध हुँदैआएको छ, यो सदाका लागि अन्त्य हुनुपर्छ’, उनले भने, “ यसप्रति मन्त्रालय सजक छ, स्थायी रुपमा समस्या समाधान गर्न मन्त्रालय सदा चिन्तित छ, यो समस्या जनताले भोग्नु नपरोस् भन्नेतिर नै ध्यान गइरहेको छ ।”

हेलिकप्टरबाट चितवनको भरतपुरस्थित आँपटारीमा पुगेका प्रधानमन्त्री देउवासहितको टोली सेतीदोभान पुग्नुअघि करिब १३ किलोमिटर मुग्लिनतर्फ दासढुंगामा आयोजित सार्वजनिक कार्यक्रममा पनि सरिक भएका थिए ।

नारायणगढ मुग्लिक सडक आयोजना तथा ठेकेदार पक्षले सडकको वर्तमान अवस्था तथा प्रगतिको बारेमा जानकारी गराएपछि प्रधानमन्त्री देउवाले सडकमा जनताले दुख पाएकोमा चिन्ता व्यक्त गर्नुहुँदै निर्माणको काम छिटोसक्न निर्देशन दिए ।

यस कार्यमा सरकारले पूर्ण सहयोग गर्ने प्रतिबद्धता पनि उनले व्यक्त गरे ।

छलफलमा भौतिक योजना तथा पूर्वाधारमन्त्री वीरबहादुर बलायरले मुग्लिन सडक अहिले मन्त्रालयलाई सबैभन्दा ठूलो चुनौतीको रुपमा खडा भएकाले अप्ठ्यारो ठाउँलाई देखाएर नबस्न निर्माण कम्पनीलाई आग्रह गरे ।

सो अवसरमा पूर्वमन्त्री तथा नेपाली काँग्रेसका केन्द्रीय सदस्य डा प्रकाशशरण महतले पुल र सडकको निर्माणको काम सँगसँगै नगरेकोमा चिन्ता व्यक्त गर्दै शर्तअनुसार काम नभए कारबाही र जरिवाना तथा राम्रो काम गर्नेले पुरस्कार पाएको सुन्न नपाएको भन्दै दुखेसो गरेका थिए ।

यस्तो महत्वपूर्ण बाटोमा ग्राभेल समेत नभएकोमा उनले दुख व्यक्त गरे।

नारायणगढ मुग्लिन सडक आयोजनाका प्रमुख चन्द्रनारायण यादवले प्रगतिविवरण प्रस्तुत गर्दै अहिलेसम्म ५३ प्रतिशत मात्रै काम सम्पन्न भएको जानकारी गराए ।

आयोजनाका संयोजक सञ्जयकुमार श्रेष्ठले आएका जिज्ञासाको उत्तर दिएका थिए । प्रधानमन्त्री कार्यालयको भौतिक निर्माण हेर्ने सचिव चन्द्र घिमिरेले लक्ष्यअनुसारको प्रगति न्यून भएको उल्लेख गर्नुहुँदै रातिमा पनि काम गर्न आग्रह गरे ।

भौतिक योजना तथा पूर्वाधार मन्त्रालयका सचिव देवेन्द्र कार्कीले कुल १० महिना भन्दा बढी म्याद नथपिने जानकारी दिँदै त्यसपछि थप्नुपरे जरिवाना लाग्ने चेतावनी दिए ।

उनले आगामी चैतसम्ममा कामसक्ने विश्वास व्यक्त गर्दै पहिरो रोकथामका लागि नेपालकै विज्ञसमूह परिचालन गरिएको जानकारी दिए ।

ठेकेदारका पक्षबाट लामा कन्ट्रक्सनका पिताम्बर बडूले कावु भन्दा बाहिरको परिस्थितिले गर्दा काममा अवरोध आएको भन्दै दिनमा चार घण्टा पनि राम्ररी काम गर्न नपाएको गुनासो गरे । सांसद रामकृष्ण घिमिरेले सडकको दुराबस्थाप्रति चिन्ताव्यक्त गरे ।

सडक सम्पन्न हुँदै ३५ मिनेटमा नारायणगढ मुग्लिन पार

नारायणगढ मुग्लिन सडकखण्ड निर्माण सम्पन्न हुँदा ३५ मिनेटमै पार गर्न सकिने सडक निर्माण आयोजनाले जनाएको छ ।

प्रधानमन्त्री शेरबहादुर देउवालाई उक्त सडकको प्रगति विवरणबारे जानकारी दिँदै नारायणगढ सडक निर्माण आयोजनाका प्रमुख चन्द्रनारायण यादवले एक घण्टा १० मिनेट लाग्ने सडक निर्माण सकिएपछि ३५ मिनेटमा पार गर्न सकिने जानकारी दिए ।

उनले साँघुरो ठाउँमा ९ मिटर र अलि खुला ठाउँमा ११ मिटरको सडक निर्माण हुने भन्दै तीनवटा क्षेत्रमा ६ वटा निर्माण कम्पनीले काम गरिरहेको जानकारी दिए । हरेक निर्माण कम्पनीमा एक÷एक कम्पनी भने भारतीय रहेको प्रमुख यादवले बताए ।

भारतबाट यही सडक भएर ८० प्रतिशत सामान आयात निर्यात हुने गरेको उनको भनाइ छ । रु तीन अर्ब ६२ करोड बजेट रहेको उक्त सडकको गएको वर्षमा रु एक अर्ब ६० करोड खर्च भएको जानकारी पनि प्रमुख यादवले दिए ।

२०३६ सालमा नारायणगढ गोर्खा सडकको रुपमा यहाँ उक्त सडक निर्माण भएको थियो । साँघुरो भएर अहिले नेपाल भारत व्यापार आयोजना अन्तर्गत सडक विस्तारको काम शुरु भएको हो । आयोजनाले अहिले विभिन्न क्षेत्रमा कालोपत्रेको काम शुरु भएको समेत जनाएको छ ।

गएको वैशाखमा म्याद सकिएपछि पटक÷पटक म्याद थप भएर निर्माणको काम चलिरहेको छ । पहिरोका कारण उक्त सडक उच्च जोखिममा छ ।

 

तपाईको प्रतिक्रिया
Road Show Real State

सम्बन्धित समाचार