fbpx

डा.केसीको चेतावनीपछि शिक्षामन्त्री बेचैन, विधेयक पारित गर्न छटपटी !


Share This

नेपालबहस संवाददाता    

काठमाडौँ । सरकारले त्रिभुवन विश्वविद्यालय शिक्षण अस्पतालका चिकित्सक प्रा डा गोविन्द केसीसँग गरेको सहमतिका आधारमा चिकित्सा शिक्षा विधेयक संसद्मा प्रस्ततु गरिएको र छलफलका क्रममा रहेको जनाएको छ ।

चिकित्सा शिक्षाका क्षेत्रमा विद्यमान विकृति, विसङ्गति तथा कमीकमजोरीलाई अन्त्य गर्न सरकार क्रियाशील रहेको र गम्भीरताका साथ काम गरिरहेको भन्दै शिक्षा, विज्ञान तथा प्रविधि मन्त्रालयले मन्त्री गिरिराजमणि पोखरेललाई लक्षित गरी सार्वजनिक गरिएको विषयप्रति गम्भीर ध्यानाकर्षण भएको जनाएको छ ।

सदनभित्र विधेयक दर्ता भइसकेको सन्दर्भमा डा केसीसँग भएको सहमति कार्यान्वय गर्ने प्रमुख थलो जननिर्वाचित संस्था नै रहेको तथ्य नभुल्नसमेत मन्त्रालयले आग्रह गरेको छ । विधेयक संशोधनको प्रक्रिया जारी रहेको र थप छलफल शिक्षा तथा स्वास्थ्य समितिमा भइरहेको छ ।

सङ्घीय संसद्को बैठक अन्त्य हुने दिनमा पनि शिक्षामन्त्री पोखरेलले चिकित्सा शिक्षा विधेयक छिटो प्रक्रियाबाट पारित गर्न भरमग्दुर प्रयत्न गरेको उल्लेख गर्दै मन्त्रालयका प्रवक्ता वैकुण्ठ अर्यालले विधायिकी अधिकारीमाथि कार्यपालिकाले हस्तक्षेप गर्न नसक्ने संवैधानिक सीमा र शक्ति पृथककीकरणको मान्यतालाई आत्मसात् गर्नुपर्ने लाकेतान्त्रिक मूल्यप्रति मन्त्रालय र मन्त्री पोखरेल सचेत रहँदै आफ्ना तर्फबाट अधिकतम पहल गरेको बताए ।

डा केसीले मन्त्री पोखरेलले विधेयकका सम्बन्धमा सार्वजनिक भएको विषयप्रति गम्भीर ध्यानाकर्षण भएको र विधेयक पारित नभएको अवस्थामा आपसी असमझदारी हुन नदिने अभिप्रयाले मन्त्रालयका सहचिव डा हरि लम्साललाई जिम्मेवारी दिइएको छ ।

मन्त्रालय सहमति तथा संवादबाटै समस्याको समाधान गर्न हरदम तयार रहेको उल्लेख गर्दै प्रवक्ता अर्यालले डा केसीसँग भएको सहमतिसमेत कार्यान्वयनमा आउने र त्यसका लागि सरकार प्रयत्नशील रहेको बताए ।

यसअघि शुक्रबार डा.केसीले पत्रकार सम्मेलन गरेर चिकित्सा शिक्षा विधेयक पारित गर्न शिक्षामन्त्री पोखरेलले अवरोध गरेको भन्दै मन्त्री पदबाट राजीनामा दिनुपर्ने माग गरेका थिए ।

डा.केसीकै अनसनका कारण अख्तियारका तत्कालिन प्रमुख लोकमानसिंह कार्कीलाई महाअभियोग लगाइएको थियो भने सर्वोच्चका प्रधानन्याायधीस गोपाल पराजुलीको आलोचना चर्किएको थियो ।

तपाईको प्रतिक्रिया