fbpx

कृषि उत्पादन वृद्धि गरी चीन र भारतसँगको व्यापार घाटा कम गर्ने मुख्यमन्त्रीको सोच


Share This

नेपालबहस संवाददाता    

विराटनगर । प्रदेश नं १ का मुख्यमन्त्री शेरधन राईले कृषि क्षेत्रलाई मुख्य प्राथमिकतामा राखेर प्रदेश सरकारले कार्यक्रम अगाडि बढाएको बताएका छन ।

नेपाल उद्योग वाणिज्य महासङ्घ प्रदेश नं १ द्वारा आयोजित ‘कृषिक्षेत्रको विकासमा सरकारी र निजी क्षेत्रको भूमिका’ विषयक अन्तरक्रिया कार्यक्रममा उनले प्रदेशको आधुनिक कृषियन्त्र र उच्च नवीन प्रविधिको प्रयोगबाट कृषि उत्पादन वृद्धि गरी छिमेकी मुलुकसँगको व्यापार घाटा कम गर्न सकिने विश्वास व्यक्त गरेका थिए ।

उनले पहाडी तथा तराईका जिल्लाहरु जडिबुटी, तरकारी र खाद्यान्नलगायत नगदे बाली उत्पादन भण्डारको रुपमा रहेको बताउँदै यसको उचित सदुपयोगबाट कृषिमा आत्मनिर्भर हुनसक्ने आधार रहेको बताए ।

कृषि क्षेत्रको विकासका निम्ति प्रदेश सरकारले नीति तथा कार्यक्रममार्फत सम्बोधन गरिसकेको बताउदैँ उनले कृषिक्षेत्रलाई उद्योगका रुपमा विकास गर्ने तथा रोजगारी सिर्जना गर्ने विषयमा समेत प्रदेश सरकारको ध्यान केन्द्रित रहेको विचार व्यक्त गरेका थिए ।

मुख्यमन्त्री राईले कृषि क्षेत्रको विकासका लागि नै केही दिन अगाडि विराटनगरमा कृषि निर्देशनालय स्थापना गरिएको बताउँदै अन्य जिल्लामा समेत कृषि कार्यालय स्थापना गरेर कृषि उत्पादनका लागि बजेट परिचालन गरिने बताए ।

तपाईको प्रतिक्रिया