यसरी सुध्रने प्रयासमा छ ‘क्यान्सर अस्पताल’


Share This

नेपालबहस संवाददाता    

१७ जेठ, काठमाडौं । केहि समययता अस्तव्यस्त बनेको बिपी कोइराला मेमोरियल क्यान्सर अस्पताल अब देखि सुधारको बाटोमा अगाडी बढ्न थालेको छ ।

कर्मचारीको आन्तरिक गुटबन्दी र सञ्चालक समितिको रिक्ततासँगै सो अस्पताल अस्तव्यस्त बनेको थियो तर सञ्चालक समितिको पूर्णता र तीन साता अघि नयाँ कार्यकारी निर्देशक नियुक्तिसँगै सुधारका काम अघि बढेको हो ।

यसअघि प्रयोगशालामा आवश्यक केमिकल नहुँदा बिरामीका आफन्तले परीक्षणका लागि बाहिर जानुपर्दथ्यो भने एमआरआई, सिटिस्क्यान, मेमोग्रामका लागि पनि लामो समय पालो कुर्नुपर्ने अवस्था थियो । रेडियोथेरापीमा पालो नपाउँदा बिरामीले क्यान्सर अस्पताल भक्तपुर र निजी अस्पतालमा धाउनु पर्दथ्यो । तर पछिल्लो समयमा सो अस्पतालले अतिरिक्त समयमा समेत सेवा दिन थालेपछि ती सबै सेवा यसै अस्पतालमा उपलब्ध हुनथालेका छन् ।

नवनियुक्त कार्यकारी निर्देशक डा विजयचन्द्र आचार्य यस अस्पतालमा आएका बिरामी सेवाको अभावमा बाहिर जानु नपरोस् भन्ने उद्देश्यले काम भइरहेको बताए ।

उनकाअनुसार प्रयोगशालामा रिएजेन्ट (केमिकल) नभएका कारण महत्वपूर्ण परीक्षण गर्न बिरामी अस्पताल बाहिर जानुपर्ने समस्या रहेकोमा ती सबै समस्या आफू आएपछि समाधान भएको बताए ।

त्यसैगरी रेडियोलोजी विभागमा बिग्रिएको एक्सरे सञ्चालनमा ल्याइएको छ भने चार महिनादेखि बिग्रिएर थन्किएको एमआरआई मेसिन सञ्चालनमा आएको छ । यी उपकरण मर्मत गरेर सुचारु गरेको उनले बताए ।

दैनिक तीनदेखि चार जनाको एमआरआई हुने यो अस्पतालमा अहिले आठदेखि १० जनाको हुने गरेको कार्यकारी निर्देशक डा आचार्यले बताए ।

निजी अस्पताल भन्दा २५ प्रतिशत कम शुल्कमा यो अस्पतालमा एमआरआई गरिँदै आएको छ । चिकित्सक तथा कर्मचारीलाई अतिरिक्त भत्ता दिएर भएपनि ती सेवा बिहान र बेलुका पनि सञ्चालनमा ल्याइएको उल्लेख गरेका छन् ।

त्यसैगरी सिटिस्क्यान सेवा पनि बिहान र बेलुका सञ्चालनमा ल्याइएको छ । कार्यकारी निर्देशक आचार्यकाअनुसार १०/१५ दिनसम्म बिरामीले पालो कुर्नुपरेकोमा आजभोलि दैनिक ४० जनासम्मको सिटिस्क्यान हुँदै आएपछि पालो कुर्नुपरेको छैन । यसअघि दैनिक १६/१७ जनाको सिटिस्क्यान गरिँदै आएको थियो ।

यसैगरी दैनिक चार/पाँचजनाको मात्रै मेमोग्राम हुने गरेकोमा अहिले १० जनासम्मको मेमोग्राम गरिएको छ भने दैनिक ४५ जनाको मात्र रेडियो थेरापी हुने भएपछि पालो नपाएर बिरामी काठमाडौँं जाने गर्दथे । अहिले दैनिक एक सय जनासम्मको रेडियो थेरापी गरिएको अस्पतालले जनाएको छ ।

त्यसैगरी दुईवटा रेडियो थेरापीका उपकरण खरिदका लागि बोलपत्र प्रक्रिया अघि बढाइएको छ । तीन महिनाभित्रमा ती उपकरण सञ्चालनमा आउने आचार्यले उल्लेख गरे । बिग्रिएको एउटा उपकरण बनाउने पहलसमेत भइरहेको उनले बताए ।

ती उपकरण निकै महँगा हुने गर्दछन् । हाल खरिद गर्न लागिएको बाहिरी सेकाइको उपकरणको मूल्य रु १७ करोड पर्दछ भने भित्री सेकाइको मूल्य रु तीन करोड पर्दछ । सेल सेप्रेसन (कोशिका छुट्याउने) मेसिन पनि अस्पतालमा ल्याइएको छ । विगत १० वर्षदेखि अस्पतालमा यो मेसिन बिग्रिएर थन्किएको थियो । क्यान्सरका बिरामीलाई प्लेटलेट्समा कमि हुने गर्दछ । यस्ता बिरामीलाई धेरै रगत दिनु पर्ने हुन्छ ।

प्लेटलेट्स र अन्य कोशिका छुट्याएर स्वस्थ मानिसको शरीरबाट रगत तानेर बिरामीलाई दिन यो मेसिनले सहयोग गर्दछ । सबै खालका परीक्षण सुरु भएसँगै अस्पतालले अहिले दैनिक रु सात लाखको हाराहारी आम्दानी गर्दै आएको छ । यसअघि अस्पतालले दैनिक रु तीन लाखदेखि रु चार लाख मात्र आम्दानी गर्दै आएको कार्यकारी निर्देशक डा आचार्यले बताए ।

अस्पताल सञ्चालक समितिका अध्यक्ष डा प्रकाश न्यौपानेले अस्पतालमा आएका बिरामी फर्कन नपर्ने अवस्थाको सिर्जना हुँदैगएको बताए ।

तपाईको प्रतिक्रिया
Road Show Real State

सम्बन्धित समाचार