हावाहुरी प्रभावित बारा र पर्सामा वाटर एम्बुलेन्स



नेपालबहस संवाददाता
 




काठमाडौं । हावाहुरी प्रभावित बारा र पर्सामा पिउने पानी शुद्धिकरणका लागि खानेपानी तथा ढल व्यवस्थापन विभागले पानी परीक्षण घुम्ती सेवा अर्थात् पानी एम्बुलेन्स पठाएको छ ।

हावाहुरी, आँधीले क्षति पुर्याएको बस्तीमा पानीका कारण रोगव्याधीको प्रकोप फैलिन नदिन खानेपानी मन्त्रालयको निर्देशनअनुसार विभागले पानी शुद्धिकरण गर्ने आधुनिक उपकरणसहितको वाटर एम्बुलेन्स त्यसतर्फ पठाएको हो।

पानी शुद्धीकरण गर्ने पियुस, एक्वा ट्याब र ब्लिचिङ पाउडरलगायतका सामग्री बोकेर विभाग र खानेपानी डिभिजन कार्यालय इटहरीबाट वाटर एम्बुलेन्स प्रभावित क्षेत्रमा पठाइएको हो।

विशेष गरी तराईमा चापाकलको मद्दतले भूमिगत पानीका स्रोतबाट पानी पिउने भएकाले स्थलगतरुपमै पानीको गुणस्तर जाँची पिउन हुने या नहुने भन्ने पत्ता लगाइने खानेपानी मन्त्रालयले जनाएको छ।

उक्त एम्बुलेन्समा आधुनिक प्रविधिको प्रयोगशाला जडान गरिएको हुन्छ। उक्त प्रयोगशालाका माध्यमबाट पानीको गुणस्तर जाँच गरिन्छ। पानी परीक्षण विशेषज्ञ किशोर पाण्डेको नेतृत्वमा टोली हावाहुरी प्रभावित क्षेत्रमा गएको छ। पानीका कारण रोगव्याधि फैलिने सम्भावना बढी हुनेहुँदा सबै किसिमका उपाय अपनाइने विशेषज्ञ पाण्डेले बताए।

विभागले आफ्नो मातहत रहेका शाखा कार्यालयमार्फत र नेपाल खानेपानी संस्थानलेसमेत आफ्नो क्षेत्राधिकारभित्र रहेर हावाहुरी प्रभावित क्षेत्रमा कार्य गरिरहेको छ।


सम्बन्धित समाचार