नेपाल पुर्नबीमा कम्पनीको आईपीओ आउने


Share This

नेपालबहस संवाददाता    

काठमाडौं । १० अर्ब रुपैयाँभन्दा बढी चुक्तापूँजी भएको नेपाल पुर्नबीमा कम्पनीले आगामी तीन महिनाभित्रमा इनिशियल पब्लिक अफरिङ (आईपीओ) जारी गर्ने भएको छ ।

आईपीओ निष्कासनका व्यवस्थापनका निम्ति राष्ट्रिय वाणिज्य बैंक (आरबिबी मर्चेण्ट) लाई तोकिएको छ ।

नेपाल पुर्नबीमा कम्पनीको पाँचौँ वार्षिकोत्सवका अवसरमा पत्रकारहरुसँग सङ्क्षिप्त कुराकानीमा कम्पनीका प्रमुख कार्यकारी अधिकृत चिरायु भण्डारीले आगामी दुई–तीन महिनाभित्रमा आईपीओ जारी हुने बताएका छन् ।

रु ७ अर्ब ५० करोडभन्दा बढी व्यापार गर्ने लक्ष्यका साथ कम्पनीले काम गरिरहेको बताउँदै उनले भारत सरकारका स्थापित चार वटा बीमा कम्पनीले नेपाल पुर्नबीमा कम्पनीसँग सहकार्य गर्नु कम्पनीका निम्ति उपलब्धि भएको उल्लेख गरेका छन् ।

प्रभावकारी पुर्नबीमा सेवा प्रदान गर्ने प्रतिबद्धता व्यक्त गर्दै उनले रु एक अर्ब ५० करोड कम्पनीले बीमा शुल्क आर्जन गरेको जानकारी दिए । उनले अन्तर्राष्ट्रियस्तरका ११ वटा कम्पनीसँग कारोवार भइरहेको बताएका छन् ।

यसैबीच कम्पनीको पाँचौँ वार्षिकोत्सवको आज ललितपुरमा उद्घाटन गर्दै अर्थमन्त्री युवराज खतिवडाले आर्जन भएको मुनाफा देशको भौतिक पूर्वाधार निर्माण एवम् जलविद्युत् उत्पादनमा उपयोग हुनुपर्नेमा जोड दिए ।

उनले भने, “पूँजी बजारको अभिन्न अङ्ग पुर्नबीमा क्षेत्रले कमाएको नाफा शहरी पूर्वाधार तथा जलस्रोतमा लगानी गर्नुपर्छ ।” किसानलाई बीमाको दायरामा ल्याउनुपर्नेमा जोड दिँदै अर्थमन्त्रीले लघुबीमा प्रवद्र्धन अपरिहार्य भएको बताए ।

विदेशी मुद्रा सञ्चितिमा पुर्नबीमाबाट केही योगदान भएको बताउँदै उनले पुनः बीमाको क्षेत्रलाई अझ सघन तुल्याउन उत्तिकै आवश्यक भएको पनि उल्लेख गरे ।

बीमा समितिका अध्यक्ष चिरञ्जीवी चापागाईंले गाउँ–गाउँमा बीमा सेवा प्रवाह हुनुपर्छ भन्दै जीवन बीमामा ३१ र निर्जीवन बीमा १८ प्रतिशतले वृद्धि भएको जानकारी दिए ।

तपाईको प्रतिक्रिया
Road Show Real State

सम्बन्धित समाचार