बुटवल उपमहानगरमा न्यायिक प्रथम इजलास सुरु


Share This

नेपालबहस संवाददाता    

बुटवल । बुटवल उपमहानगरपालिका न्यायिक समितिको प्रथम इजलास सुरु भएको छ । समितिको कार्यविधि तयार भएपछि सोमबार प्रथम इजलास बसेको हो । इजलासमा हिंसापीडित भएको भन्दै दर्ता भएको एकजना पुरुषको मुद्दा पेश भएको छ ।

उक्त मुद्दाको पहिलो छलफलका लागि पेशी तोकिएकामा निवेदकको निवेदन बमोजिमको जिकिर न्यायिक समितिले सुनेर आदेश दिएको छ ।

सो मुद्दामा स्थानीय सरकार सञ्चालन ऐन, २०७४ को दफा ४९ ९८० ९क० बमोजिम न्यायिक समितिका संयोजक उपमहानगरपालिकाका उपप्रमुख गुमादेवी आचार्यको इजलासले दुवै पक्षलाई पुनः छलफलका लागि झिकाउन आदेश गरेको छ ।

निवेदन जिकिरअनुसार तत्काल अन्तरिम आदेश जारी गर्नुपर्ने वा नपर्ने सम्बन्धमा विचार गर्दा दुवै पक्षलाई झिकाउने भन्दै आउँदो जेठ ७ गते छलफलका लागि अर्को पेशी तारिक तोकिएको छ ।

उपमहानगरपालिकाको न्यायिक समितिमा हालसम्म २५ वटा मुद्दा दर्ता भएका छन् । जसमध्ये १७ वटा मुद्दा मेलमिलापका माध्यमबाट निरुपण गरिएको उपप्रमुख आचार्यले बताए । पतीपत्नीका बीच विवाद, लेनदेन, नाता सम्बन्ध कायम, जग्गा विवाद, घरबहालसम्बन्धी र घरेलु हिंसाका विषय दर्ता भएको अधिकृत कल्पना अर्यालले बताए ।

उपमहानगरपालिकाले कार्यविधि बनाउनुअघि वडा समितिमार्फत मेलमिलाप बाट १३५ मुद्दाको निरुपण गरेको उपमहानगरका प्रवक्ता रामप्रसाद रेग्मीले बताए । तीमध्ये सम्बन्ध विच्छेदसम्बन्धी तीन वटा मुद्दालाई जिल्ला अदालतमा पठाइएको उपप्रमुख आचार्यले बताए।

कार्यविधि तयार भएपछि भने न्यायिक समितिमा आठ वटा मुद्दा दर्ता भएका छन् । जसमा घरबहाल सम्झौतासम्बन्धी, सम्बन्ध विच्छेद, खान लाउन घर बस्न अधिकार दिलाइ पाऊँ, विवाह दर्ता, जन्मदर्ता गरिपाउँ भन्ने रहेको आचार्यले बताए।

तपाईको प्रतिक्रिया
Road Show Real State