भूमि आयोग खारेजीको माग गर्दै ज्ञापनपत्र, आयोग र समितिका पदाधिकारीबिच चर्काचर्की

२० माघ, काठमाडौं । सुकुम्बासी समस्या समाधान गर्न नसकेको भन्दै उपत्यकाबासी व्यवस्थापन तथा सहयोग संघर्ष समितिले राष्ट्रिय भूमि आयोग खारेजीको माग गरेको छ ।

काठमाडौं उपत्यकाका नदी किनारमा बसेका सुकुम्बासीलाई हटाउन खोज्दा आयोगले हस्तक्षेप गरेर रोकेको भन्दै त्यसको विरोधमा ज्ञापन पत्र बुझाउन गएका संघर्ष समितिका पदाधिकारीले आयोग खारेजीको माग गरेका हुन् ।

आयोगका पदाधिकारीले बागमती किनारामा बसेका नागरिकको छातिमा डोजर चलाएर बस्ती खाली गर्न नपाउने बताएपछि संघर्ष समिति गठन गरेर आयोगको विरोधमा कार्यक्रम चलाएको हो ।

शुक्रबार समितिका पदाधिकारीले काठमाडौंको बालाजु बाइपास सडक विस्तारका क्रममा स्थानीयबासिन्दामाथि बल प्रयोग गरेर ३९ वटा घर भत्काउँदा आयोग कहाँ थियो भनेर आयोृगका पदाधिकारीसँग प्रश्न गरेका थिए ।

ताहचलमा रहेको आयोग कार्यालयमा पुगेर ज्ञापनपत्र बुझाइसकेपछि भएको केहीबेरको छलफलमा आयोग र समितिका पदाधिकारीबिच चर्काचर्कीसमेत भएको छ ।

उपत्यकाका नदी किनारा खाली गराउने अधिकार सम्पन्न बागमती एकीकृत विकास समितिको योजना र काममा हस्तक्षेप नगर्न समितिले आयोगलाई सचेत गराएको छ ।