त्रिविको स्ववियु चुनावमा नेविसंघबाटै दुई समूह दर्ता

१९ फागुन, काठमाडौं । आगामी ५ चैतमा त्रिविको स्वतन्त्र विद्यार्थी युनियन (स्ववियु)चुनावमा भाग लिन नेपाली कांग्रेसको विद्यार्थी संगठन नेविसंघको दुईवटा समूहले छुट्टाछुट्टै संगठन दर्ता गराएका छन् ।

त्रिभुवन विश्वविद्यालय (त्रिवि)मा सभापति शेरबहादुर देउवा पक्षका पुरन रोकाया र शेखर कोइराला पक्षका गणेश भण्डारीले आज नेविसंघ दर्ता गराएका हुन् । संगठन दर्ताको समय आज दिउँसो १० बजेदेखि ३ बजेसम्म लागि तोकिएको थियो ।

स्ववियु नतेृत्व चयनका लागि आउँदो चैत ५ गते त्रिविका आंगिक ५२ वटा र सम्बन्धनमा रहेका देशैभरका कलेजहरुमा मतदान हुँदैछ ।

नेविसंघमा नेता पक्षधरताका आधारमा निरन्तर विवाद हुँदै आइरहेको छ । नेविसंघको केन्द्रीय अध्यक्षमा पार्टी सभापति शेरबहादुर देउवाले डुजाङ शेर्पालाई एक्लौटी निर्णयले नियुक्त गरेपछि विवाद झनै चर्किँदै गएको छ ।