पूर्व अध्यक्ष महर्जन बेलायत भागेपछि सुमेरु सेभिङका सबै शाखा बन्द, सर्वसाधारणको ८ अर्ब डुब्ने खतरा

७ वैशाख, काठमाडौं । ललितपुरको पुल्चोकमा केन्द्रीय कार्यालय रहेको सुमेरु सेभिङ एण्ड क्रेडिट को ओपरेटिभमा सर्वसाधारणको झण्डै ८ अर्ब रुपैयाँ बचत रकम डुब्ने खतरा बढेको छ । सहकारीका वचतकर्ताबाट उठेको अरबाैं रकम सुमेरू ग्रुपले हस्पिटल, कलेज, रियलस्टेट लगायतका क्षेत्रमा लगानी विस्तार गरेको थियो ।

सहकारीको ठुलो रकम हिनामिना गरेको आरोप लागेका पूर्व अध्यक्ष भरत महर्जन लामो समयदेखि बेलायतमा हराएपछि सदस्यहरूको बिचल्ली भएको छ । पूर्व अध्यक्ष भरत महर्जनसहित उनका आफन्त सञ्चालकहरु हेमराज दाहाल, विनोद आचार्य, दिलीप डङगोल, सुनील डङ्गोल, सोछन्दा मानन्धर, रमेश महर्जन लगायतले स्थापना गरेको सो सहकारीले अहिले जनताको ८ अर्ब रकम फिर्ता गर्न नसकेको बचतकर्ताहरूले बताएका छन् । सो रकममध्ये ५ अर्ब बढी रकम अहिले बेलायतमा रहेका पूर्व अध्यक्ष महर्जनले नै चलाएको आशंका गरिएको छ ।

अहिले सो सहकारीले चलाएको सुमेरु सिटी हस्पिटल, धापाखेलमा रहेको सुमेरु हस्पिटल, कलेज सबै अरबौंकाे लोनमा रहेको बुझिएको छ । हेमराज दाहाल नेतृत्वको नयाँ सञ्चालक समितिले हस्पिटल, जग्गा जमिन, कलेज राम्रैसँग चलेको बताएर सर्वसाधारणको निक्षेप महिनौंसम्म फिर्ता नगरी जनताको आँखामा छारो हाल्ने काम गर्दै आएको छ । सहकारीको पछिल्लो जालझेलपूर्ण गतिविधिमा नयाँ समितिका सदस्यहरू अगाडि नदेखिए पनि कर्मचारी र सदस्यहरूलाई धाकधम्की दिएर सहकारीको सीइओले बोल्न नदिने गरेको स्रोतले बतायो । सो कारण सदस्यहरू तथा कर्मचारीहरू कहाँ कुन निकायमा जाने अन्योलमा छन् ।

स्रोतका अनुसार अहिले सो सहकारीका कतिपय सदस्यहरूको बेलायत तथा अमेरिकाको भिषा लगाएर उतै कुद्न थालेको हल्ला चल्न थालेको छ । उक्त सहकारीका एकाउन्टेन अहिले अष्टेलियामा छन् । सुमेरु ग्रुपबाट जनताको पैसा फिर्ता हुने सम्भावना टर्न थालेको बचत कर्ताहरुले नै बताउन थालेका छन्  । सुमेरु हस्पिटल, कलेज पनि बैंकले लिलाम गर्ने अवस्थामा पुगेको पाइएको छ । सरकारले समयमै नियन्त्रणमा नलिने हो भने सबै बोर्ड सदस्यहरू विदेश भाग्ने खतरा बढेको स्रोतले बतायो । अहिले सो सहकारीकाे केन्द्रीय कार्यालयसहित ४ वटै शाखा बन्द अवस्थामा छन् ।