तुलसी सहकारीका बचतकर्तालाई किस्ताबन्दीमा बचत रकम फिर्ता दिइने, इच्छुकले जग्गा समेत लिन सकिने

१३ वैशमख, काठमाडौं । तुलसी बहुमुखी सहकारी संस्थाको झापास्थित दमक शाखामा देखिएको समस्या तत्कालका लागि टर्ने भएकाे छ । सहकारी र बचतकर्ताहरूबीच रकम सुरक्षित तवरले फिर्ता गर्ने र सहकारीको काम सुचारु गर्न दिनेबारे सम्झौता भएपछि लामो समयदेखि चलिरहेको समस्या समाधानको बाटोमा पुगेको ठानिएको छ । 

दमक नगरपालिकाको कार्यालयमा भएको सम्झौतामा दमकका प्रमुख राम थापासमेतको उपस्थितिमा पीडक र पीडित पक्षबीच सम्झौतापत्रमा हस्ताक्षर गरिएको छ । 

दमक उद्योग वाणिज्य महासंघ र स्थानीय प्रशासनको रोहबर रहेको छ । बचत रकम फिर्ता पाउन संघर्षरत बचतकर्ताहरुले सहकारीलाई आफ्नो सेवा सञ्चालन गर्ने र उसका प्रतिनिधिलाई निर्धर्वा ढंगले कामकाज गर्ने दिने सहमति बनेको छ । 

सहमतिअनुसार एक लाख रुपैयाँसम्मको बचत कर्तालाई गार्डेन मार्टबाट सामान खरिद गर्ने सुविधा दिने, एक लाख रुपैयाँदेखि ५ लाख रुपैयाँसम्मका बचतकर्तालाई २०८० साउन महिनादेखि २५ प्रतिशतका दरले दुई दुई महिनामा बचत फिर्ता गर्ने भएको छ ।

यस्तै, ५ लाख देखि २८ लाख ९९ हजारसम्मको लागि २०८० कात्तिकदेखि १५/१५ प्रतिशतका दरले प्रत्येक दुईरदुई महिनामा बचत फिर्ता गर्ने, ५ लाखदेखि माथिका बचत कर्तालाई प्रत्येक २०८० पुस महिनादेखि प्रत्येक दुईरदुई महिनामा १० प्रतिशतका दरले रकम भुक्तानी गर्ने सहमति भएको छ ।

पाँच लाखदेखि २५ लाख रुपैयाँसम्मको बचतकर्ता ९४ जना रहको सहकारीले जनाएको छ । उनीहरुलाई सहकारीबाट आफ्नो बचत बराबरको जग्गा जमिन तथा भौतिक संरचना पनि लिन पाइने व्यवस्था गरिएको छ ।

सहकारी संचालकहरूले भने भौतिक पूर्वाधार र जग्गामा लगानी भएकाे र पर्याप्त पुँजी भएकै अवस्थामा पनि राष्ट्रिय अर्थतन्त्रमा देखिएकाे संकटका कारण बचतर कममा असर परेको तर्क छ । सहकारीले डिपार्टमेन्टल स्टाेर लगायत व्यापारिक केन्द्रहरू समेत संचालन गर्दै आएकाे छ ।

बचत रकम फिर्ताको माग गर्दै बचतकर्ता सहकारीमा धर्नासहित आन्दोलित थिए । रकम फिर्ता गर्न नसक्दा संचालक फरार थिए । उपाध्यक्षसहित केही संचालकलाई प्रहरीले पक्राउ गरी ठगी मुद्दा चलाएको छ ।