अरुण तेस्रो जलविद्युत आयोजना नजिकै पहिरो खस्दा थुनियो नदी

१७ वैशाख, संखुवासभा । संखुवासभामा निर्माणाधीन अरुण तेस्रो जलविद्युत आयोजना नजिकै फ्याक्सिन्दा भन्ने ठाउमा सुख्खा पहिरो खस्दा अरुण नदी थुनिएको छ । नौ सय मेगावाटको अरुण तेस्रो आयोजनास्थल फ्याक्सिन्दामा सुख्खा पहिरो खसेपछि अरुण नदी थुनिएको हो । आइतबार बिहानबाट सुक्खा पहिरो खसिरहेकाले अहिले डाइभर्सनबाट नदीको पानी बगाउने प्रयास भइरहेको छ । 

अरुण थुनिएपछि अरुण तेस्रो आयोजनाको ड्यामसाइडको काम पनि ठप्प भएको छ । निर्माणस्थलमा निर्मित टनेल थुनिएपछि अहिले आयोजना पक्षले ड्यामसाइडबाट नदीको पानी फ्लो गराउने प्रयास गरिरहेको जिल्ला प्रहरी कार्यालय संखुवासभाले जनाएको छ । सुक्खा पहिरो खसिरहेकाले नियमित मार्गबाट नदीको बहाव गराउन केही समय लाग्ने देखिएको छ ।

नदी थुनिएको ठाउँ खतराबाट बाहिर रहेको प्रहरीले जनाएको छ । नदीको बहाव नियमित मार्गबाट गराउन भने केही समय लाग्ने देखिएको छ । प्रहरी घटनास्थलमा पुगिसकेको र स्थानीय बासिन्दा पनि सक्रिय रहेकाले नियमित मार्गबाट नदीलाई बगाउने प्रयास भइरहेको बताइएको छ ।