तातोपानी नाकामा मानव आवतजावतमा प्रतिबन्ध कायमै

१९ वैशाख, काठमाडौं । चीनसँगको मुख्य व्यापारिक नाका तातोपानीमा मानव आवतजावत अझै खुला गरेको छैन । बन्द भएको ८ वर्षपछि सोमबारदेखि दुईतर्फी रुपमा व्यापारिक कारोबार सुरु गरिएपनि मान्छे आउजाउ भने खुलाइएको छैन । 

२०७२ को भूकम्पपछि पूर्णरूपमा बन्द भएको नाका २०७६ बाट आंशिक रुपमा व्यापारिक कारोबार सुरु भएको थियो । सोमबारबाट भने सामान आयात निर्यात मात्र खुला गरेको छ । मानव आवतजावत तत्काल खोल्ने सम्भावना नरहेको तातोपानी भन्सार कार्यालयका प्रमुख दयानन्द केसीले जानकारी दिए ।

भूकम्पपहिले यो नाकाबाट थुप्रै नेपाली मजदुर तिब्बतका विभिन्न क्षेत्रमा पुगेर काम गर्ने र चिनियाँ पर्यटक यही नाकाबाट नेपाल भ्रमणमा आउने गर्थे । नेपालीहरु घरायसी सामान खरिदका लागि चिनियाँ बजार लिपिङ, खासा पुग्ने गर्थे ।