जिप्रका सर्लाहीमा आगलागी विद्युत सर्टबाट भएको निष्कर्ष

२० वैशाख, काठमाडौं । सर्लाही जिल्ला प्रशासन कार्यालयमा भएको आगलागी विद्युत सर्टबाट भएको निष्कर्ष निकालिएको छ । आगलागीबाट नागरिकता फाँटमा क्षति पुगेको छ । आगो निभाउन दमकलले पानी फ्याँक्दा राहदानी फाँटमा समेत क्षति पुगेको छ ।

आगलागीबाट फाँटमा रहेका दुई थान कम्प्युटर, दुई थान प्रिन्टर र दुई थान स्क्यानर जलेर नष्ट भएको प्रमुख जिल्ला अधिकारी इन्द्रदेव यादवले बताए । 
फाँटमा रहेको अन्य कागजात भने सुरक्षित रहेको उनले बताए । प्रहरी आगलागी घटना विद्युत तार जलेर भएको निष्कर्षमा पुगेको उनले बताए ।

वाइरिङको काम बधबार सकिने र सेवाग््राहीलाई बिहीबारबाट सेवा दिने सकिने उनको भनाइ छ । आगलागी मंगलबार बिहान ६ बजेतिर भएको पाइएको छ । कार्यालयबाट दिइने नागरिकता, राहदानी, राष्ट्रिय परिचय–पत्रलगायतको सेवा ठप्प छ ।