रासायनिक मल कारखाना बनाउन बजेट छु्ट्याउनुपर्छ : सांसद राणा

२५ वैशाख, काठमाडौं । आगामी आर्थिक वर्षको बजेटमा रासायनिक मल कारखाना निर्माणका लागि बजेट विनियोजन गर्न सांसदहरुले सरकारसँग माग गरेका छन् । 

सोमबार बसेको प्रतिनिधिसभाको बैठकमा विशेष समयमा राप्रपाका सांसद धवल शमशेर राणाले आउने बजेटमा मल कारखाना संचालन गर्न आवश्यक बजेट छुट्याउन माग गरेका छन् । 

उनले सन् १८८४ मा जाइकाले तयार गरेको अध्ययन प्रतिवेदनले औल्याएअनुसार नेपालमा मल काराखाना निर्माण र संचालन गर्न सजिलै गर्न सकिने बताए । वार्षिक अर्बौं रुपैयाँ मल खरिद गर्न नेपाली रकम विदेशिरहेको भन्दै खरिदमा हुने खर्चभन्दा निकै कम मूल्यमा मल कारखाना चलाउन सकिने कुरा प्रतिवेदनले देखाएको र सोअनुसार सरकार अगाडि बढ्न सुझाए । 

मकै र धान बालीका लागि रासायनिक मल आवश्यक भइसकेको अवस्थामा सरकार मौन बसेको भन्दै आपत्ति जनाए । किसानलाई समयमै मल उप्लब्ध गराउन सरकारको जाेडदार रूपमा ध्यानाकर्षण गराए । कारखाना बनाउन रकम नछुट्याइए राप्रपाले निरन्तर खबरदारी जारी राख्ने समेत उनले बताए । 
उनले भूटानी शरणार्थी प्रकरणका कुनैपनि ओहोदाका दोषीलाई कारवाही गर्न माग गरे ।