दलहरू नै ‘टोपबहादुर खोई’ भन्दै सडक प्रदर्शन चर्काउँदै

२९ वैशाख, काठमाडौं । नक्कली भुटानी शरणार्थी प्रकरणमा ठगीको आरोप लागेपछि फरार भएका एमाले सांसद टोपबहादुर रायमाझी लगायतलाई चाँडो पक्राउ गर्न माग गर्दै देशका मुख्य शहरमा प्रदर्शन हुने क्रम बढेको छ ।

शुक्रबार काठमाडौं, मोरङको विराटनरमा नागरिक समाजको ब्यानरमा नागरिकहरुले स्वस्फूत रुपमा सडकमा निस्केनर खबरदारी प्रदर्शन गरेका छन् । काठमाडौंमा सरकारको नेतृत्व गरिरहेको माओवादी केन्द्रनिकट युवा संगठन योङ कम्युनिष्ट लिग ‘वाईसीएल), पार्टी निकट जनवर्गी संघ संगठनहरुले प्रदर्शन गरेका छन् ।

नक्कली भुटानी शरणार्थी प्रकरण छानबिनमा सरकारलाई खुट्टा कमाऊन खबरदारी गर्दै उनीहरुले ‘भ्रष्टाचार जनघात र संगठित अपराध हो, टोपबहादुर खोई, सदन र सरकारबाट दबाब’ जस्ता नारा लेखिएका प्लेकार्ड प्रदर्शन गरेका थिए । प्रदर्शनमा सयाैं संख्यामा महिला पुरूष सहभागी  थिए । आफूहरुको प्रदर्शन भ्रष्टाचारीविरुद्धको अभियान भएको सहभागीहरुले बताए ।

आजै विराटनगरमा सरकारका घटक दल एकीकृत समाजवादीले रायमाझी लगायत फरार रहेकालाई तत्काल पक्राउ गरी कारवाहीको दायरामा ल्याउन माग गर्दै र्याली निकाल्यो । आफूहरुको प्रदर्शन भ्रष्टाचारीविरुद्धको अभियान भएको सहभागीहरुले बताए ।

नक्कली शरणार्थी काण्डले देशकै बेइज्जत गराएको भन्दै जुनसुकै पार्टीको भएपनि यो प्रकरणमा मुछिएकाहरूलाई कारबाही हुनुपर्नेमा उनीहरूले जोड गरे । र्‍यालीमा सहभागीहरूले मानव बेचविखन गर्ने काम बन्द गर, गृहमन्त्री खुट्टा नकमाउ लगायतका नारा लेखिएका प्लेकार्ड प्रदर्शन गरेका थिए ।

प्रकरणका सबै दोषीलाई कारवाही गर्न सरकार मुख्य घटक नेपाली कांग्रेसका महामन्त्रीद्वय गगन थापा र विश्वप्रकाश शर्माले सरकारलाई खबरदारी गरेका छन् । कांग्रेसका भातृ संगठनहरुले गृहमन्त्री नारायणकाजी श्रेष्ठलाई भेटेर भ्रष्टाचारी र जनघातीलाई कारवाही गर्न खुट्टा नकमाउन ज्ञापन पत्र बुझाएका छन् । प्रकरणमा तानिएका सबैलाई कारवाहीको दायरामा ल्याउन भन्दै राप्रपाले आजै मात्र प्रधानमन्त्री प्रचण्डलाई भेटेर ज्ञापन पत्र बुझाएको छ ।

प्रकरणमा नेपाली कांग्रेसका नेता एवं पुर्व गृहमन्त्री बालकृष्ण खाण, सरकारका बहालवाला सचिव टेकनारायण पाण्डेसहित १२ जना पक्राउ परिसकेका छन् भने ३ जना फरार छन् । प्रकरणमा खाण पत्नी मञ्जु, पुर्वप्रधानमन्त्री शेरबहादुर देउवा पत्नी आरजु लगायत सांसदहरुको नाम जोडिएको छ ।