टीकापुर घटनामा ७ वर्ष जेल बसेपछि निर्दोष ठहरिएका सीताराम रिहा, गंगारामविरूद्ध अर्काे मुद्दा

३ जेठ, कैलाली । टिकापुर हत्या घटनामा ७ वर्ष पहिले जिल्ला र उच्च अदालतबाट दोषी करार भई जेल भुक्तान गरिसकेका सीताराम चौधरी सर्वोच्च अदालतबाट निर्दोष ठहर भएपछि बुबार रिहा भएका छन् । 

२०७२ भदौ ७ मा नेपाल प्रहरीका एसएसपी लक्ष्मण न्यौपानेसहित ७ प्रहरी र एक नाबालको हत्या भएको घटनामा संलग्नताको आरोपमा चौधरीलाई २०७३ वैशाख २७ गते प्रहरीले पक्राउ गरी डाँका, कर्तव्य ज्यान, ज्यान मार्ने उद्योग कसुरमा मुद्दा चलाएको थियो । मुद्दामा उनलाई कैलाली जिल्ला र उच्च अदालतले समेत दोषी ठहर गर्दै जेल चलान गरेको थियो । 

उनले मंगलबारसम्म ७ वर्ष ६ दिन कारागार बसेका छन् । सो घटनामा २३ जनालाई दोषी करार गरिएकोमा सीताराम र गंगाराम चौधरीलाई सर्वोच्चले निर्दोष ठहर गरेको थियो । सर्वोच्चको फैसलामा सीताराम र गंगारामलाई अन्य मुद्दा र कारणबाट थुनामा राख्नुनपर्ने भए तत्काल रिहा गर्न भनिएको थियो । 

तर गंगारामविरुद्ध अर्को ज्यानसम्बन्धी मुद्दा भएका कारण रिहा नगरिएको कारागार प्रशासनले जनाएको छ ।