ल्यापटप बाँड्ने प्रदेशसभा सचिवालयको सांसदबाटै विरोध

४ जेठ, विराटनगर । कोशी प्रदेशका सांसदहरुले आफहरुूलाई ल्यापटप खरिदका लागि छुट्याएको बजेट युवालाई रोजगारी सृजनाका लागि खर्च गर्न सुझाव दिएका छन् । 

नेकपा (माओवादी केन्द्र)का प्रदेश सांसद गणेश उप्रेतीले सांसदका लागि ल्याटप खरिद गर्न छुट्याएको बजेट युवालाई रोजगारी सृजनाका लागि खर्च गर्न प्रदेश सचिवालयलाई सुझाव दिएका छन् । 

प्रदेश सरकारले रकामान्तर गरेर प्रदेशसभा सचिवालयलाई एक करोड ५० लाख रुपैयाँ बजेट उपलब्ध गराएपछि सचिवालयले सांसदलाई बाँड्नका लागि ल्यापटप खरिद प्रकिया अगाडि बढाएको अवस्थाबीच उनले यस्तो बताएका हुन् । ‘ल्यापटप हामी आफैँ किन्छौ । सरकारले यो बजेट युवालाई रोजगारी सृजना गर्न खर्च गरोस्’ सांसद उप्रेतीले भने । 

प्रदेशसभामा रहेका ९३ सदस्य र ७ संसदीय समितिका सचिवलाई वितरण गर्न १०० वटा ल्यापटप खरिद गर्ने प्रक्रिया अगाडि बढेको सिचवालयका सचिव गोपालप्रसाद पराजुलीले बताए । 

सांसदलाई ल्यापटप किन्ने तयारीबारे समाचार सार्वजनिक भएपछि सर्वसाधारणबाटै चर्को विरोध सुरु भएको छ । नागरिकको पसिनाबाट जम्मा भएको राजश्वलाई अनुत्पादक र मनपरी तवरले खर्च गर्न खोजिएको भन्दै सरकारको आलोचना भइरहेको छ ।

नेकपा माओवादी केन्द्र संसदीय दलका नेता इन्द्रबहादुर आङ्बो र कांग्रेस सांसद केदार कार्कीले संसदलाई बदनाम गर्नका लागि ल्यापटप खरिदको प्रक्रिया अगाडि बढाएको भन्दै ल्यापटप बाड्न आवश्यक नरहेको बताए । विरोधका बाबजुद सचिवालयले जबर्जस्ती बाँड्ने ल्यापटप अस्वीकार गर्ने उनीहरुले बताए । ल्यापटप बाँडिए नीतिगत भ्रष्टाचार ठहरिने उनीहरुको भनाइ छ ।