उर्जा मन्त्रालयमा लुकेकै अवस्थामा पक्राउ परे हज समितिका अध्यक्ष शमशेर मियाँ

४ जेठ, काठमाडौं । नक्कली शरणार्थी प्रकरणमा मुछिएका नेपाल हज समितिका अध्यक्ष शमशेर मियाँ पक्राउ परेका छन् । सिंहदरबार परिसरबाट उनलाई पक्राउ गरिएको हो । उनी उर्जा मन्त्रालयमा लुकेर बसेको अवस्थामा प्रहरीले पक्राउ गरेको हो । उनलाई काठमाडौं प्रहरी परिसर लगिएको छ ।

शरणार्थी प्रकरणमा संलग्नहरुलाई सिंहदरबारभित्र आउजाउ गर्दा समेत प्रहरीले सुईको पाउन सकेको छैन । अन्य पक्राउ गर्न खोजिएका आरोपीहरु पनि यही अवस्थामा घुमिरहेका छन् । प्रहरीले पक्राउ गर्ने जानकारी पाएपछि मियाँले हज समितिको कार्य वाहकको जिम्मेवारी अर्का व्यक्तिलाई दिने तयारी गरिरहेका थिए । यसै बेला बिहीबार बिहान प्रहरीले ऊर्जा मन्त्रालय परिसरबाट पक्राउ गरेको हो । 

हज समितिको गाडी नक्कली शरणार्थी बनाउने क्रममा प्रयोग भएको थियो । गिरोहले पनि उनको गाडी प्रयोग गर्ने गरेका थिए । गृह मन्त्रालय अन्तर्गत नेपाल हज समितिका अध्यक्ष मियाँलाई तत्कालीन गृहमन्त्री थापाले २०७७ माघ ७ मा नियुक्त गरेका थिए । थापा हटेपछि गृहमन्त्री बनेका खाँणले मियाँको कार्यकाल २ वर्ष थपिदिएका थिए । जुन दलको सरकार बन्छ, त्यसैका नेता/कार्यकर्तालाई हज समितिमा नियुक्ति गर्ने अभ्यास थियो । मियाँ भने अपवाद बने ।

स्रोतका अनुसार नक्कली शरणार्थी बन्ने मानिसको खोजी गर्ने, त्यसका लागि हज समितिको गाडी प्रयोग गर्ने र गिरोहको योजनाअनुसार थप काम गर्ने जिम्मा मियाँले लिएका थिए । त्यसको पोल खुलेपछि उनी सम्पर्कविहीन थिए । बिहीबार कार्यवाहक जिम्मेवारी अर्कै व्यक्तिलाई दिने गरी तयारी गरिरहेका बेलामा उनी पक्राउ परेका हुन् ।