नक्कली शरणार्थी अनुसन्धानमा मियाँलाई २ दिन हिरासतमा राखिने

४ जेठ, काठमाडौं । नक्कली भुटानी शरणार्थी प्रकरणमा बिहीबार पक्राउ परेका हज समितिका अध्यक्ष शमशेर मियालाई २ दिन थुनामा राखेर अनुसन्धान गर्न जिल्ला अदालत काठमाडौंले प्रहरीलाई अनुमति दिएको छ । 

मियालाई प्रकरणमा अनुसन्धान गर्न म्याद थपका लागि आजै अदालत लगिएको थियो । २ दिन हिरासतमा राख्न अनुमति पाएको जिल्ला सरकारी वकिल कार्यालय काठमाडौंका प्रमुख अच्युतमणि न्यौपानेले बताए ।

भुटानी शरणार्थी प्रकरणमा जोडिएका गिरोहसँग मियाको साँठगाँठ देखिएपछि पक्राउ गरिएको थियो । अनुसन्धानका क्रममा मियाँ चढ्ने सरकारी नम्बर प्लेटको सरकारी गाडीमा गिरोहले पैसा ओसारपसार गरेको खुलेको प्रहरीको दाबी छ । 

प्रकरणमा संलग्नताका आरोपमा प्रहरीले आजै मात्र भुटानी शरणार्थी नेता टेकनाथ रिजाललाई पक्राउ गरेको छ । उनलाई पनि २ दिन हिरासतमा राखेर अनुसन्धान गर्न अदालतबाट प्रहरीले अनुमति पाएको छ ।