जनमोर्चाले भन्यो- ‘रेशम चौधरीलाई आममाफी दिनु राजनीतिको अपराधीकरण’

१२ जेठ, काठमाडौं । राष्ट्रिय जनमोर्चाले नागरिक उन्मुक्ति पार्टी (नाउपा)का नेता रेशम चौधरीलाई आममाफी दिन सरकारले अघि बढाएको प्रक्रियाको विरोध गरेको छ । 

अध्यक्ष चित्रबहादुर केसीले आज विज्ञप्ति जारी गर्दै चौधरीलाई आममाफी दिने कार्यले दण्डहीनता, अपराधको राजनीतिकरण र राजनीतिको अपराधीकरण बढ्ने उसको निष्कर्ष छ । 

कैलालीको टिकापुर २०७२ भदौ ७ मा नेपाल प्रहरीका एसएसपीसहित ७ प्रहरी र एक नाबालको ज्यान जाने गरी भएको काण्डमा दोषी ठहर भई सर्वस्वसहित जन्मकैदको सजाय भोगिरहेका चौधरीलाई सरकारले गणतन्त्र दिवसको दिनको अवसर पारेर बाँकी सजाय आममाफी दिने प्रक्रिया अघि बढाएको छ । त्यो प्रक्रियालाई रोक्न जनमोर्चाले माग गरेको छ ।

‘टिकापुर हत्याकाण्ड कुनै राजनीतिक नभएर आम नरसंहारको घटना भएको जनमोर्चाको तर्क छ । घटनाका मुख्य नाइकेको रुपमा जिल्ला, उच्च र सर्वोच्च अदालतले ठहर गरेको छ । सरकारले अगाडि बढाएको प्रक्रिया आफ्नो सरकार टिकाउन गरिएको राजनीतिक लेनदेन वा सौदावाजी मात्र हो,’ विज्ञप्तिमा लेखिएको छ । चौधरी नाउपाका संरक्षक समेत हुन् ।

आममाफी दिन सरकारले निवेदन राष्ट्रपति रामचन्द्र पौडेलसमक्ष पुर्याइसकेको छ । राष्ट्रपतिबाट सहमति आए गृहमन्त्रालयले चौधरीको फाइल मन्त्रिपरिषदमा लैजानेछ । प्रधानमन्त्री प्रचण्डले चौधरीलाई रिहाइ गर्ने आश्वसनमा नाउपालाई सरकारमा सामेल गराएका छन् । नाउपाबाट पार्टी अध्यक्ष एवं रेशमपत्नी रञ्जिता श्रेष्ठ  भूमि व्यवस्था मन्त्री छिन् ।

चौधरीलाई रिहाई गर्न नहुने भनेर घोषित रुपमा विराेधमा उत्रने जनमोर्चा एक्लो पार्टी हो ।