संशोधन प्रस्तावलाई वेवास्ता गर्दै नीति तथा कार्यक्रम पारित

१४ जेठ, काठमाडौं । संशोधनका लागि परेका २० वटा प्रस्तावलाई लत्याउँदै सरकारको आगामी आर्थिक वर्ष ०८०/८१ को नीति तथा कार्यक्रम संघीय संसदको दुवै सदनबाट बहुमतले पारित भएको छ । राष्ट्रपति रामचन्द्र पौडेलले ५ जेठमा संघीय संसदमा आफ्नो सम्बोधनमार्फत पेस गरेको नीति तथा कार्यक्रम कुनै परिमार्जनबिना एक साताभन्दा बढी समय छलफल गरेर पारित भएको हो ।

राष्ट्रिय सभाले परेका तीन वटा संशोधन अस्वीकृत गर्दै ९ जेठमा बहुमतले पारित गरेको थियो भने २० वटा संशोधन परेको प्रतिनिधिसभाले एउटा पनि नसमेटेर बहुमतका आधारमा हुबहु पारित गरेको हो ।प्रतिनिधिसभाले १६ वटा संशोधन प्रस्ताव अस्वीकृत गरेको थियो भने चार वटा प्रस्ताव सांसदले आफैँ फिर्ता लिएका थिए । 

कांग्रेस, माओवादी, जसपा, एकीकृत समाजवादी, जनमत, लोसपा, नागरिक उन्मुक्तिको समर्थनमा नीति तथा कार्यक्रम पारित हुँदा एमाले, रास्वपा, राप्रपा, नेमकिपा र जनमोर्चाले असहमति राख्दै विपक्षमा उभिएका थिए । सदनमा आठ दिनसम्म छलफल भएको नीति तथा कार्यक्रममा कुनै परिमार्जन भएन ।  । 

प्रतिनिधिसभा बैठकमा प्रधानमन्त्री पुष्पकमल दाहाल प्रचण्डले सदनमा भएको छलफलबाट विगतजस्तै अहिले पनि नीति तथा कार्यक्रम परिमार्जन गर्न सम्भव नभएको स्पष्ट पारेका पार्दै बजेटबाट सम्बोधन गर्ने आश्वासन दिएका थिए । उनले संसदको छलफलबाट केही नहुने भन्ने होइन, बजेटबाट पनि सम्बोधन गर्न सकिन्छ भन्दै त्यसकारण छलफलको कामै छैन भन्नु उपयुक्त नहुने बताएका थिए ।  

 आफू नेतृत्वको दुइटै गठबन्धनका साझा न्यूनतम कार्यक्रमलाई समेटेर आएको नीति तथा कार्यक्रम राष्ट्रियहितको दस्तावेज भएको उनले जिकिर गरे । अर्थतन्त्र पूर्ण रूपमा चुनौतीबाट मुक्त नभएको भन्दै प्रधानमन्त्री प्रचण्डले अर्थतन्त्रको पुनर्संरचना, पुनरुत्थानलाई उच्च प्राथमिकता राखेको बताए ।