प्रदर्शनकारी र प्रहरीबीच झडपका कारण विराटनगर तनावग्रस्त

१४ जेठ, काठमाडौं । कोशी प्रदेशको राजधानी विराटनगर तनावग्रष्त बनेको छ । कोशी नाम खारेजीको माग गर्दै आइतबार बिहानैदेखि आन्दोलनका उत्रिएका पहिचानवादी आन्दोलनकारी र प्रहरीबीच भएको झडपका कारण अहिले विराटनगरका मुख्य चोक र बजार रणमैदान बनेको छ । 

प्रदेशसभाबो बैठक आज बस्दैछ । प्रदर्शनकारीहरु निषेधित क्षेत्र तोडेर बैठक हलतर्फ अगाडि बढेपछि प्रहरीले बल प्रयोग गरेको छ । भीड तितरवितर पार्न प्रहरीले दर्जनौं संख्यामा अश्रु ग्यास प्रहार गरेका छन् । पानीको फोहोरा समेत हानेका छन् । 

प्रदर्शनकारीलाई प्रहरीतर्फ ढुंगामुढा गरेका छन् । झडपमा केही संख्यामा प्रहरी र आन्दोलनकारी घाइते भएका छन् ।  प्रहरीले ३ दर्जभन्दा बढी संख्यामा अन्दोलनकारीलाई गिरफ्तार गरेको छ ।

गएको पुषमा प्रदेशसभामा रहेका एमाले, कांग्रेस माओवादी केन्द्रका प्रदेशसभाका बहुमत सदस्यहरुले प्रदेशको नाम कोशी पारित गरेपछि पहिचान पक्षधरहरुले पहिचानको आधारमा नाम राख्नुपर्न माग गर्दै आन्दोलन गर्दै आएका छन् । 

आन्दोलनका क्रममा गत फागुनमा प्रहरीको दमनबाट आन्दोलनकारी पदमबहादुर लिम्बूको ज्यान गएको थियो । उनलाई सरकारले शहीद घोषणा गरिसकेको छ । 

प्रदेशमा नाम पहिचानका आधारमा नामाकरण नभएसम्म आन्दोलन नरोकिने उनीहरुले बताएका छन् । पछिल्लो समयमा माओवादी केन्द्रले नामकरण परिवर्तनबारे ‘सोच्न’ सकिने बताएको छ ।