एनएमबि बैंककाे महोत्तरी शाखा लुटपाटमा संलग्न अझै पक्राउ परेनन्

१७ जेठ, काठमाडौं । प्रहरीले महोत्तरीको एनएमबि बैंक लुटपाटमा संलग्न कसैलाई पनि पक्राउ गर्न सकेको छैन । मंगलबार मध्यान्ह साढे १२ बजे शाखा संचालन भइरहेको बेला नकाब लगाएका हतियारधारी समूह प्रवेश गरेर ३५ लाख रुपैयाँ लुटेर फरार भएको थियो । 

महोत्तरी गाउँपालिका शाखामा ४ जनाको हतियारधारी समूहले पेस्तोल देखाएर सुरक्षा गार्ड र कर्मचारीलाई ज्यान मार्ने धम्कीसहित नियन्त्रणमा राखेर नगद लुटेका थिए । शाखा कार्यालय भवनको पहिलो तल्ला रहेको छ ।

नगद बोकेर लुटेराहरु मोटरसाइकल चढेर भारततर्फ फरार भएको प्रत्यक्षदर्शीले बताएका छन् । लुटेरा र लुटपाटको दृष्य बैंकमा रहेको सीसी टिभीमा कैद भएको छ । सीसीटिभीको फुटेजका आधारमा हुलिया पहिचानको काम भइरहेको र लुटेराको तीव्र खोजी भइरहेको महोत्तरी प्रहरी प्रमुख प्रकाश मल्लले बताए । 

अहिले शंकास्पद व्यक्तिहरुमाथि स्क्रिनिङ भइरहेको र कोही पनि पक्राउ परिनसकेको उनको भनाइ छ । घटनाको खबरलगत्तै भारतीय नाका शिल्ड गरिएको छ ।