पेप्सीकोलामा सुनको सिक्री लुटेर फरार युवक जोरपाटीबाट पक्राउ

१७ जेठ, काठमाडौं । सुनको सिक्री लुटपाट गरेको आरोपमा प्रहरीले जोरपाटीबाट एक युवकलाई पक्राउ गरेको छ । पक्राउ पर्नेमा काभ्रेपलाञ्चोकको धुलिखेल नगरपालिका–१ देवीटार बस्‍ने ३० वर्षीय पाण्डे भन्‍ने विष्णु तामाङ रहेको प्रहरीले जनाएको छ । 

उनलाई काठमाडौं उपत्यका अपराध अनुसन्धानको टोलीले मंगलबार साँझ पक्राउ गरेको हो । तामाङमाथि काठमाडौं महानगरपालिका–३२ पेप्सीकोलास्थित गत हप्ता गेटवे मोन्टेश्वरी स्कुलअगाडि पैदल हिडिरहेकी मध्‍यपुर ठिमी–७ बस्‍ने मनमाया छुजुको घाँटीको सुनको सिक्री लुटेर फरार भएको आरोप छ ।

आरोपी तामाङलाई  प्रहरीले बुधबार सार्वजनिक गरेको छ । उनलाई आवश्यक अनुसन्धानका लागि  प्रहरी वृत बानेश्वरमा पठाइएको छ ।